1 Korintu 3 - Mukanda Wa Zambi 1970

Tuvumbi twa Zambi

¹ Akwetu, yami chahashile kuhanjika kuli yenu ngwe kuli waze akwete Mwiku wa Zambi, alioze ngwe kuli akwa hashi hano, ngwe kuli ana waze maachitata ha yikuma ya Kristu.

² Nanunwishine yamwa, hi yakulia ko, mumu te kunwahashile kuyilia, chibwe haliabwila kunwahashile kuyilia,

³ mumu ndoo ni haliabwila nuchili ni ndako yibi ya utu. Nyi hakachi kenu nuli ni ukwa ni kulihamika, yuma ngwe yize kuyishi kulweza ngwo, kunushi ni Mwiku wa Zambi, nyi? Kuyishi kulweza ngwo, nwakwenda nikulita ni ndako yibi ya uutu, nyi?

⁴ Muze umwe hakachi kenu kanambe ngwenyi: “Yami nguli wa Paulu,” ni mukwo ngwenyi: “Yami nguli wa Apolo”—yuma ngwe yize kuyishi kulweza ngwo, nwakulinga nikulita ni ndako yibi ya uutu, nyi?

⁵ Mwe Apolo iya? Hanji Paulu iya? Yetu tuli lume tuvumbi twa Zambi, twanulongesele ku fuliela. Mutu ni mutu hakachi ketu tunalingi milimo yize atuhele Zambi ha kulinga.

⁶ Yami natumbile mbuto, Apolo mwe wayihinjilile meya, alioze Zambi wayitatwishile.

⁷ Yoze wakukuwa mbuto ni yoze wakuyihinjila meya, hi alemu ko. Zambi wika mwe mulemu, mumu iye wakutatwisa ye mbuto.

⁸ Yoze wakutumba mbuto ni yoze wakuyihinjila meya kaali chimuwika. Zambi makahana chawana kuli mutu ni mutu nikulita ni milimo yenyi.

⁹ Mumu yetu twakulingila Zambi hamuwika, ni yenu nuli munda wa Zambi. Nawa, nuli zuwo lia Zambi.

¹⁰ Ni chawana chize anguhele Zambi, nakulinga milimo ya tungi yoze wanyingika kutunga mazuwo kanawa. Yami nasele fundamentu. Mutu mukwo kakutunga ho. Alioze mutu ni mutu akanyame chize matunga ho.

¹¹ Mumu, chamwenemwene, Zambi hanase Yesu Kristu ye fundamentu. Niumwe kahashile kusa fundamentu yikwo.

¹² Ha kutanga ha fundamentu yize, amwe maatunga ni oru, hanji ni prata, hanji ni mawe alemu. Akwo maatunga ni mitondo, hanji ni mwambu, hanji ni yiswaswa.

¹³ Tangwa lia Kristu mulikasolola milimo ya mutu ni mutu. Mumu tangwa lize mulikeza ni kahia. Ke kahia ke mukakeseka milimo ya mutu ni mutu, ha kusolola milimo yenyi.

¹⁴ Nyi milimo ya umwe yize atungile ha fundamentu muyilinduluka, mutu yoze makatambula chawana.

¹⁵ Alioze, nyi milimo ya umwe muyiwema yeswe upu, mutu yoze kechi katambula nichimwe. Alioze iye mwene Zambi makamulamwina ngwe yoze watuhuka mu kahia, wachina.

¹⁶ Kunwanyingikine ngwenu, nuli zuwo lia Zambi, ni Mwiku wa Linanga watwama muli yenu, nyi?

¹⁷ Kashika, nyi umwe monona zuwo lia Zambi, ni Zambi makamwonona. Mumu zuwo lia Zambi lili lia chijila, ni yenu, nuli lie zuwo lienyi.

¹⁸ Niumwe kanda alionga. Nyi umwe hakachi kenu Wakulinyonga ngwenyi, nguli mukwa mana nikulita ni ndako ya hashi, hatangu chamutamba kubwa chihepuke, mba makabwa mukwa mana wamwenemwene.

¹⁹ Mumu yize atu akunyonga ngwo, ya mana, ku meso ja Zambi yili uhepuke. Ngwe chize hichinasonewa mu Mukanda wa Zambi ngwo: “Zambi kakwoza akwa mana ni ukanyama wo ene.”

²⁰ Nawa ngwo: “Mwene Zambi kananyingika ngwenyi, manyonga ja akwa mana kaali amokomoko.”

²¹ Kashika, niumwe kanda alisamba hakutwala ku yize akulinga atu. Mumu yeswe yili niyenu:

²² Paulu, ni Apolo, ni Petulu, ni hashi, ni mwono, ni kufwa, ni mwakono, ni mwaka uze muwisa ho—yize yeswe yili niyenu,

²³ ni yenu nuli a Kristu, ni Kristu kali wa Zambi.