1 Korintu 2 - Mukanda Wa Zambi 1970

Kwambujola sango ja Kristu yoze ahachile ha kulusu

¹ Akwetu, muze nejile kuli yenu mu kununyingikisa chijimbikilo cha Zambi, chejile ni maliji anene anene ahiana, hanji ni kulengumuka cha mana jami.

² Mumu, muze nabwile hakachi kenu, nabatwile kuvulama yuma yeswe yikwo, ni kunyonga lume chikuma cha Yesu Kristu, yoze ahachile ha kulusu.

³ Kashika, muze nejile kuli yenu, nabwile mulelu, nachikimine ni woma.

⁴ Longeso liami ni kwambujola chami kuyabwile ni maliji a kukununa nikulita ni mana ja atu, alioze yabwile ni shindakenyo ya ndundo ja Mwiku wa Linanga.

⁵ Kashika, ufulielo wenu hi wa ku mana ja atu ko, alioze wa ku ndundo ja Zambi.

Mana ja Zambi

⁶ Alioze nakulongesa ni mana, atu angunu mu ufulielo. Hindu hi ni mana ja mwakono ko, chibwe ni mana ja akwa kuyula ja mwakono, waze chiyulo cho muchikahwa.

⁷ Mana waze nakulongesa kali mana a chijimbikilo cha Zambi, waze ahengamine kuli atu. Zambi hanatongola mana waze, mumu ha uhenya wetu, muze te kanda achitanga hashi.

⁸ Mukwa kuyula niumwe wa mwakono wanyingikine mana waze. Nyi te haananyingika mana waze, kachi kaaliachile ko Mwene wetu wa uhenya ha kulusu.

⁹ Alioze ngwe hichinasonewa mu Mukanda wa Zambi ngwo: “Yuma yize mutu niumwe kaamwene ko hanji keevwile ko nilimwe tangwa, yuma yize mutu niumwe kanyongene ngwenyi, muyihasa kubwa, yenayo Zambi alulikilile waze akumuzanga.”

¹⁰ Alioze Zambi hanasolola mana jenyi nikusongwela cha Mwiku wenyi. Mwiku uze wakuhengula yuma yeswe, chibwe ubatwilo uze wahengamine muli Zambi.

¹¹ Hakutwala kuli mutu, shina mwiku wenyi Unanyingika yize yahengama muli iye mwene. Chimuwika nawa hakutwala kuli Zambi, shina Mwiku wa Zambi Unanyingika yuma yeswe yize yahengama muli Zambi.

¹² Alioze yetu kutwatambwile mwiku wa hano hashi, alioze Mwiku uze atumine Zambi, hanga tunyingike yiwape yeswe yize atuhele Zambi.

¹³ Kashika, muze twakulumbununa yikuma ya Zambi kuli waze akwete Mwiku wa Zambi, kutushi kulongesa nikulita ni mana ja atu, alioze nikulita ni mana ja Mwiku wa Zambi.

¹⁴ Alioze mutu yoze keshi Mwiku wa Zambi kahashile kutambula yikuma yize yakwiza kuli Mwiku wa Zambi. Kahashile kuyinyingika, yili uhepuke kuli iye, mumu kakuyinyingika shina ni Mwiku wa Zambi.

¹⁵ Mutu yoze ukwete Mwiku wa Zambi kanahase kubatula yuma yeswe ni kwamba ngwenyi: “Ayi yilemu, ayi yilelu,” alioze iye, niumwe mamubatwila.

¹⁶ Ngwe hichinasonewa mu Mukanda wa Zambi ngwo: “Iya Unanyingika manyonga ja Mwene Zambi? Iya mahasa kumulongesa?” Alioze yetu, nyonga lia Kristu tuli nalio.