1 Korintu 16 - Mukanda Wa Zambi 1970

Chawana cha kukwasa nacho akwa Kristu mu Yudea

¹ Hakutwala ku kuhana cha chawana cha kukwasa nacho akwa Kristu yiswale waze ali mu Yerusaleme, lingenu ngwe chize nalongesele akwa Yikungulwila mu Galashia.

² Mu lumingo mweswe, mutu mweswe hakachi kenu chamutamba kuchiza Chihanda cha mbongo jenyi nikulita ni jize akutambula ni kujisweka mu zuwo lienyi. Mba muze mungukeza kutuchi kakunga nawa mbongo.

³ Nutongole amwe atu hanga muze mungukanuheta ngukaatume ni mikanda, hanga akatwale chawana ku Yerusaleme.

⁴ Nyi chinalite yami kuya, maakaya hamwe ni yami.

Manyonga ja Paulu ha wenyi

⁵ Mungukanuheta muze mungukabalika mu chifuchi cha Masedonia, mumu Changutamba kubalika mu Masedonia.

⁶ Kota mungukabwa ku mahienu matangwa anji, chibwe mwaka wamuundu wa chishika, mba nukahase kungushinjikila mu jila yami kweswako mungukaya.

⁷ Mumu Chazangile kunumona ha kubalika wika. Ngunase mbunge ngwami, mungukabwa hamwe nenu shimbu lisuku, nyi Mwene Yesu mapala.

⁸ Alioze ngunanyongo kusala muno mu Efesu ndoo ku tangwa lia Pentekoste.

⁹ Mumu hinawana chajilo chakwazulula ha kulinga milimo yinawaha muno, chibwe akwa kole kaanoko naye.

¹⁰ Nyi Timoteu makanuheta, nukamutambula kanawa, hanga kanda abwa ni woma, mumu kakulinga milimo ya Mwene Yesu ngwe yami.

¹¹ Mutu niumwe kanda amulelesa, alioze chanutamba kumushinjikila mu jila yenyi ni uhwimino, mba makahiluka kuli yami. Mumu ngunamushimbwila hamwe ni akwetu akwo.

¹² Alioze hakutwala kuli mukwetu, Apolo, hingunamulembejeka kanji kwiza ni akwetu akwo mu kunutala, alioze ndoo haliabwila kapalile kwiza. Kota makeza muze makahasa.

Kushika

¹³ Kanyamenu, manenu nguu mu ufulielo wenu, bwenu ni hamu, takamenu,

¹⁴ lingenu yeswe ni zango.

¹⁵ Nunanyingika kanawa Stefana ni akwa zuwo lienyi. Ayo kaali akwa Kristu atangu mu chifuchi cha Gresia. Nunanyingika nawa ngwenu, haanalihana ha kukwasa akwa Kristu akwo. Kashika akwetu, ngunanulembejeka

¹⁶ ngwami, esekenu kuzeyela kuli atu ngwe waze ni mweswe wakulinga hamwe no.

¹⁷ Ngunawahilila ha kuheta cha Stefana, ni Fortunatu, ni Akaiku, mumu haangulingila chize yenu nwahonene kungulinga.

¹⁸ Haananguhwimisa mbunge ngwe chize haananuhwimisa yenu mbunge. Chatamba kulemesa atu ngwe waze.

¹⁹ Yikungulwila ya mu chifuchi cha Asia kaananumeneka. Akwila ni Prisila ni Chikungulwila chize akunguluka mu zuwo lio kaananumeneka mu jina lia Mwene Yesu.

²⁰ Akwetu eswe muno kaananumeneka. Limenekenu ni mbeju ya kulinanga.

²¹ Yami, Paulu, ngunasoneka maliji wano ni kwoko lia yami mwene: Mwoyo wenu!

²² Mutu yoze keshi kuzanga Mwene Yesu—Zambi amushinge! Maranata Mwene wetu eze!

²³ Mwene Yesu anulweze utu.

²⁴ Ngunanumeneka eswe ni zango mu jina lia Yesu Kristu.