1 Korintu 15 - Mukanda Wa Zambi 1970

Uhindukilo wa Yesu

¹ Akwetu, ngunazange kununyingikisa hakutwala ku Sango Jibema jize nanwambujolele, jize nwafulielele, jize jinakolesa ufulielo wenu.

² Sango jino jakunulamwina, nyi nwakujifunga. Nyi ka, ufulielo wenu muubwa wamokomoko.

³ Sango jize yami natambwile, jenajo nawa nanulongesele. Sango jino ngwami, Yesu hanafwila milonga yetu ngwe chize hichinasonewa mu Mukanda wa Zambi.

⁴ Atu yaamufunda. Mba Zambi yamuhindwisa ku kufwa ha tangwa lia muchitatu ngwe chize hichinasonewa mu Mukanda wa Zambi.

⁵ Yesu yasolokela Petulu, mba yasolokela tumbaji eswe kumi ni aali.

⁶ Mwabwamuze, ha chisuho chimuwika, yasolokela akwa kufuliela kuhiana kulakaji jitano. Anji hakachi ko achili ni mwono, alioze amwe haanafu.

⁷ Mwabwamuze, yasolokela Tiangu (Jake), mba tunganda twenyi eswe.

⁸ Hakusula yangusolokela yami, chibwe nguli ngwe mwana wa kuselumuna.

⁹ Mumu yami nguli mukepe Wahiana hakachi ka tunganda twa Yesu. Kuchalitele kunguvuluka ngwo, kanganda ka Yesu, mumu nahungumionene Chikungulwila cha Zambi.

¹⁰ Alioze ku utu wa Zambi nguli chize nguli, ni utu uze angulwezele hi wamokomko ko. Mumu hingunahondangana kuhiana tunganda akwo eswe, alioze yize yeswe hi tachi ja yami mwene ko, alioze utu wa Zambi uze walinga hamwe ni yami.

¹¹ Chenacho twakwambujola, chibwe yami, chibwe ayo, Chenacho nawa nwafulielele.

Uhindukilo wetu

¹² Nyi twakwambujola ngwetu, Kristu hanahinduka ku kufwa, mba kuchi amwe hakachi kenu akwamba ngwo, afu keechi kahinduka ku kufwa?

¹³ Nyi yize akwamba yili yamwenemwene, kuma Zambi kahindwishile ko Kristu ku kufwa.

¹⁴ Nyi Zambi kamuhindwishile ko ku kufwa, kwambujola chetu chili chamokomoko, ni ufulielo wenu nawa uli wamokomoko.

¹⁵ Nyi chize akwamba ngwo: “Uhindukilo wa afu kuushiko,” chili chamwenemwene, kuma tuli yela ja mahuza ha chikuma cha Zambi. Mumu hitunambujola ngwetu, Zambi hanahindwisa Kristu ku kufwa.

¹⁶ Nyi afu keshi kuhinduka ku kufwa, Kristu neye nawa Zambi kamuhindwishile ko ku kufwa.

¹⁷ Nyi Zambi kahindwishile ko Kristu ku kufwa, ufulielo wenu uli wamokomoko, ni yenu nuchili mu shili yenu.

¹⁸ Nyi Chenacho, akwa Kristu waze haanafu, haanatoko.

¹⁹ Nyi yetu chatutamba kusa mbunge kuli Kristu ha mwono uno wika, atu maahasa kutuvwila chinyengo kuhiana atu akwo eswe.

²⁰ Alioze chamwenemwene Zambi hanahindwisa Kristu ku kufwa. Iye mwe mutangu kuhinduka ku kufwa. Uhindukilo wenyi unalweze ngwo, waze haanafu, Zambi makaahindwisa ku kufwa.

²¹ Mumu ngwe chize kufwa chejile mumu hali mutu umuwika, chimuwika nawa uhindukilo ku kufwa wejile mumu hali mutu umuwika.

²² Mumu ngwe chize atu eswe kaakufwa mu kulinunga ni Samutu chimuwika nawa eswe maakabwa ni mwono mu kulinunga ni Kristu.

²³ Alioze Zambi kakuhindwisa atu wasula ko wasula ko: Hatangu hanahindwisa Kristu, mba kulutwe makahindwisa akwa kufuliela ha kuhiluka cha Kristu.

²⁴ Hohene songo mulikeza, muze Kristu makakumba Sakwonga ni tunganda twenyi twa yiyulo yeka ni yeka, ni muze makakunjika Wanangana kuli Zambi Tata.

²⁵ Mumu Kristu chamutamba kuyula ndoo Zambi makakumba akwa kole jenyi eswe ni kwaasa kushi lia molu jenyi.

²⁶ Mukwa kole wakusula yoze Zambi makakumba kali kufwa.

²⁷ Mumu hichinasonewa mu Mukanda wa Zambi ngwo: “Zambi hanazeyesa yuma yeswe kushi lia molu jenyi.” Alioze muze anambe ngwo: “yuma yeswe,” Zambi, yoze wakusa yuma yeswe kushi lia molu ja Kristu, iye mwene keshimo.

²⁸ Alioze, muze Zambi hasa yuma yeswe mu chiyulo cha Kristu, mba Mwana iye mwene makalizeyesa ku chiyulo cha Zambi yoze hazeyesa yuma yeswe kuli iye, mba Zambi makayula yuma yeswe liakulu.

²⁹ Nawa, nyi yize atu akwamba yili yamwenemwene ngwo, afu keechi kahinduka ku kufwa, kuchi kevwe atu akwo hanapapachisa mumu hali waze haanafu? Nyi afu keechi kahinduka kuchi mba akwapapachisa?

³⁰ Ni yetu nawa, kuchi mba twakulikunjika ku utojo ola jeswe?

³¹ Akwetu, tangwa heswe nguli mu utoji wa kufwa! Hingunanwambulwila yuma yino mumu nakuwahilila ni yenu mu kuliendela chetu ni Kristu Yesu, Mwene wetu.

³² Nyi ngwe hingunatalika ni “tushitu asasu” muno mu Efesu, ni tachi ja uutu, yika munguyuka nyi Zambi keshi kuhindwisa afu? Tulingenu ngwe chize akwamba ngwo: “Tulienu, tunwenu, mumu hamene mutukafwa,” nyi chamwenemwene afu keeshi kuhinduka.

³³ Atu kanda anwonga: “Masepa abi kaakubihisa ndako yibema.”

³⁴ Bwenu ni manyonga abema ngwe chatamba. Ehukenu kuvulumuna. Amwe hakachi kenu kunwanyingikine Zambi. Ngunambe chino ha kunukolesa sonyi.

Mijimba ya waze maakahinduka ku kufwa

³⁵ Umwe mahula ngwenyi: “Ngwe kuchi afu maahasa kuhinduka ku kufwa? Mijimba yika maakabwa nayo?”

³⁶ Chihepuke! Muze wakutumba mbuto hashi, kuyahashile kwima nyi kuyafwile ko.

³⁷ Chuma chize wakutumba chili mbuto wika, tangwa likwo mbuto ya tiriku hanji mbuto yeka, alioze hi che chibuta ko.

³⁸ Zambi kukuhana mujimba uze anapale ku ye mbuto, mbuto ni mbuto ni mujimba wayo.

³⁹ Misunya ya akwa mwono hi musunya umuwika ko, alioze kuli musunya umwika wa atu, ni ukwo wa tushitu, ni ukwo wa tujila, ni ukwo wa yishi.

⁴⁰ Kukuli mijimba ya mwilu ni mijimba ya hashi. Mijimba ya mwilu yikwete uhenya wayo, ya hano hashi neyo yikwete uhenya weka.

⁴¹ Tangwa likwete uhenya walio, kakweji neye kakwete uhenya weka, matongonoshi nawa uhenya ukwo akwete, ni mwene mukachi ka matongonoshi muli uhenya weka ni weka.

⁴² Chenacho muchikabwa nawa uhindukilo wa afu. Muze haafunda mufu, mujimba wenyi muubola. Alioze muze makahinduka ku kufwa, mujimba uze makabwa nawo, kuwahashile kubola.

⁴³ Mujimba uze haaufunda kuuli ubi ha kuutala ni ulelu. Alioze, muze mutu makahinduka ku kufwa, mujimba uze makabwa nawo muubwa wa uhenya ni wa tachi.

⁴⁴ Mujimba uze haaufunda uli wa musunya, alioze mujimba wa mutu yoze makahinduka ku kufwa muukabwa mujimba wa uzambi. Kukuli mujimba wa musunya, kukuli nawa mujimba wa uzambi.

⁴⁵ Mumu hichinasonewa mu Mukanda wa Zambi ngwo: “Mutu mutangu yoze atangile Zambi, Samutu, yamutanga wa mwono.” Alioze Samutu wakusula kali Mwiku uze wakuhana mwono.

⁴⁶ Hi mujimba wa uzambi ko wakusoloka hatangu, alioze mujimba wa musunya, mba kulutwe mujimba wa uzambi.

⁴⁷ Zambi yatanga Samutu mutangu ni fufuta ya hashi, Samutu wa muchaali wejile mwilu.

⁴⁸ Waze a hashi kaalifwa ni yoze atangile ni fufuta ya hashi, waze a mwilu kaalifwa ni yoze wejile mwilu.

⁴⁹ Ngwe chize twalifwa ni yoze atangile ni fufuta ya hashi, mutukalifwa nawa ni yoze wa mwilu.

⁵⁰ Akwetu, ngunambe chino ngwami, musunya ni manyinga kuyishi kuhasa kunjila mu Wanangana wa Zambi. Mujimba uze wakufwa kuwahashile kubwa ni mwono uze kuushi kuhwa.

⁵¹ Banjikenu chijimbikilo chino, ngwami, hi eswe ko hakachi ketu maakafwa, alioze Zambi makalumuna mijimba yetu yeswe,

⁵² susumuku, ha kukamuna cha liso, muze tunganda a mwilu maakemba chitavwi chakusula. Muze maakachimba, Zambi makahindwisa afu, no keechi kafwa nawa, ni yetu eswe makatwalumuna.

⁵³ Mumu mujimba uze wakubola chatamba kuzala uze kuushi kubola, ni uze wakufwa chatamba kuzala uze kuwahashile kufwa.

⁵⁴ Muze uze wakubola muukazala uze kuwahashile kubola, ni uze wakufwa muukazala uze kuwahashile kufwa, hohene Chisoneko cha Mukanda wa Zambi muchikamanunuka ngwo: “Kufwa hichajimuka, kukumba hichabwa!”

⁵⁵ “Yena kufwa, chilihi kukumba che? Yena kufwa, jilihi tachi je jakulemeka?”

⁵⁶ Tachi ja kufwa ha kulemeka jakwiza ku shili, ni tachi ja shili jakwiza ku Shimbi.

⁵⁷ Alioze tuchichimiekenu Zambi yoze wakutukwasa ha kukumba ku tachi ja Mwene wetu Yesu Kristu!

⁵⁸ Kashika, akwetu akwa Kristu, manenu nguu, kanda nukokoloka. Takamenu matangwa eswe mu milimo ya Mwene Yesu, mumu nunanyingika ngwenu, Chuma nichimwe chize nwakulinga mu milimo ya Mwene muchikabwa chamokomoko.