1 Korintu 14 - Mukanda Wa Zambi 1970

Maliji akwo hakutwala ku yawana yize Mwiku wa Linanga akuhana

¹ Lalaminyenu zango. Senu mbunge jenu ku yawana yize Mwiku wa Linanga akuhana, alioze kuhiana ku chawana cha kuhanjika munanyi.

² Yoze wakuhanjika maliji waze atu kaanyingikine keshi kuhanjika ni atu alioze ni Zambi, mumu niumwe wakumwivwa. Ku tachi ja Mwiku wa Linanga akulumbununa yijimbikilo.

³ Alioze yoze wakuhanjika munanyi, kakuhanjika ni atu, kakwatakamisa mu ufulielo, kakwakolesa ni kwalembejeka.

⁴ Yoze wakuhanjika maliji waze atu kaanyingikine, kakulitakamisa iye mwene, alioze yoze wakuhanjika munanyi, kakukolesa Chikungulwila cheswe.

⁵ Nakuzanga ngwami, yenu eswe nuhanjike maliji waze kunushi kunyingika, alioze nakuzanga kuhiana ngwami, yenu eswe bwenu ni chawana cha kuhanjika munanyi. Mumu yoze unahanjika munanyi kali mulemu Wahiana yoze unahanjika maliji waze atu kaanyingikine—shina kachi umwe mahasa kulumbununa yize anahanjika, mba Chikungulwila cheswe maajikiza mu ufulielo wo.

⁶ Kashika akwetu, haliabwila nyi nanuheta, kukwasa chika nyi ngunahanjika maliji waze atu kaanyingikine? Nichimwe, shina ngunulweze Usolwelo wa Zambi, hanji yinyingi, hanji liji lia kuli Zambi, hanji longeso.

⁷ Chibwe yuma yize kuyishi mwono, ngwe ndembo hanji kalialia, ngwe kuchi mutu mahasa kunyingika liji liayo nyi keshi kuyimba chibema?

⁸ Nyi mutu yoze wakwimba chitavwi cha jita keshi kuchimba chibema, iya malilulika ha kuya ku jita?

⁹ Chimuwika ni yenu, ngwe kuchi mutu mahasa kunwivwa nyi nunahanjika maliji waze atu kaanyingikine? Yize munuhanjika muyibwa lume ngwe fuji.

¹⁰ Hano hashi kuhali maliji eka ni eka, alioze liji ni liji ulumbunwiso walio likwete.

¹¹ Nyi Chanyingikine liji lize mutu anahanjika, yoze unahanjika mabwa ngwe kandaka kuli yami, ni yami mungubwa ngwe kandaka kuli iye.

¹² Nwakuzanga chinji kubwa ni yawana yize Mwiku wa Linanga akuhana, alioze chanutamba kufupa kuhiana kukolesa nayo Chikungulwila.

¹³ Kashika, yoze unahanjika maliji waze atu kaanyingikine, alembe Zambi anwehe chawana cha ulumbunwiso wa maliji waze.

¹⁴ Mumu, nyi ngunalembe ni maliji waze atu kaanyingikine, mbunge yami yinalembe, alioze yinyingi yami kuyalembele.

¹⁵ Mba kuchi Changutamba kulinga? Mungulemba ni mbunge yami, alioze mungulemba nawa ni yinyingi yami. Mungwimba ni mbunge yami, alioze mungwimba nawa ni yinyingi yami.

¹⁶ Muze unasakwila Zambi ni mbunge wika, ngwe kuchi yoze kanyingikine yize unahanjika mahasa kwamba ngwenyi: “Chibwe kama Chenacho,” ku kusakwila che? Kahashile kunyingika chize unambe.

¹⁷ Chibwe kusakwila che chinalite, hindu kuchakwashile mutu mukwo.

¹⁸ Nakusakwila Zambi ngwami, nakuhanjika maliji waze Chanyingikine kuhiana yenu eswe.

¹⁹ Alioze mu yilemba ya mu Chikungulwila, ngunazange kuhiana kuhanjika maliji atano ashi ha kulongesa atu akwo, kuhiana kuhanjika tununu ni tununu a maliji waze atu kaanyingikine.

²⁰ Akwetu, kanda nubwa ngwe twanuke mu kunyonga chenu. Bwenu ngwe ana hakutwala ku yuma yibi, alioze bwenu makulwana mu kunyonga chenu.

²¹ Hichinasonewa mu Mukanda wa Shimbi ngwo: “ ‘Munguhanjika ni atu wano, munguhanjika no ni maliji a tundaka, chibwe chocho, hindu atu jami keechi kangwivwa.’ Chenacho anambe Zambi.”

²² Kashika, yawana ya kuhanjika ni maliaji waze atu kaanyingikine yili chilayi kuli waze keeshi kufuliela, hi kuli akwa kufuliela ko. Alioze yawana ya kuhanjika munanyi yili chilayi kuli akwa kufuliela, hi kuli waze keeshi kufuliela ko.

²³ Kashika, nyi Chikungulwila cheswe haalikungulula, ni eswe kaanahanjika maliji waze atu kaanyingikine, nyi mwanjila atu waze kaanyingikine hanji waze keeshi kufuliela, keechi kwamba ngwo: “Nunazaluka,” nyi?

²⁴ Alioze, nyi eswe kaanahanjika munanyi, muze yoze keshi kufuliela hanji yoze kanyingikine manjila, makunuka ku milonga yenyi ha liji lize anevu. Yuma yize ye muyikamuhisa.

²⁵ Manyonga jenyi waze akuhengeka maamoneka ku meso ja atu eswe, mba mafulamana nikuwayila Zambi, mashindakenya ngwenyi: “Chamwenemwene Zambi kali hakachi kenu!”

Kuwayila chize chinalite mu Chikungulwila

²⁶ Akwetu, kuchi ngunazange kwamba? Ngwami, muze munulikungulula mu kuwayila, umwe mabwa ni mwaso, mukwo mabwa ni longeso, mukwo mabwa ni Usolwelo wa kuli Zambi, mukwo malongesa mu maliji waze atu kaanyingikine, mukwo, nawa, malumbununa maliji waze. Yize yeswe chatamba kukolesa Chikungulwila.

²⁷ Nyi mutu mahanjika maliji waze atu kaanyingikine, chibema atu aali hanji atatu wika kuhanjika, umuwika, umuwika. Mutu mukwo, nawa, malumbununa yuma yize anahanjika.

²⁸ Alioze, nyi kunushi yoze mahasa kulumbununa maliji waze, holenu kwenu kuluu mu Chikungulwila. Mutu chamutamba kuhanjika lume iye mwene ni Zambi.

²⁹ Akwa munanyi ja Zambi aali hanji atatu wika chaatamba kulongesa. Akwo chaatamba kushishika yize anahanjika.

³⁰ Alioze, nyi Zambi masolola Usolwelo kuli umwe mutu yoze unatwama mu Chikungulwila, yoze unahanjika chamutamba kuhola.

³¹ Yenu eswe munuhasa kuhanjika munanyi, umuwika umuwika, hanga atu eswe alilongese ni kutakama.

³² Yoze uli ni chawana cha kuhanjika munanyi, chamutamba kuyula chawana chize.

³³ Mumu Zambi hi Zambi ya chizungozungo ko, alioze ya uhwimino. Ngwe mu Yikungulwila yeswe ya akwa Kristu,

³⁴ mapwo chaatamba kuhola kuluu muze nwakukunguluka, kuchalitele ayo kuhanjika, ngwe Mukanda wa Shimbi unambe ngwo, mapwo kuchatambile kuyula.

³⁵ Nyi maazanga kuhula yuma, chaatamba kuhula malunga jo mu mazuwo jo. Chili sonyi, nyi pwo mahanjika muze anawayila mu Chikungulwila.

³⁶ Kuma maliji a Zambi kuli yenu ejilile, nyi? Hanji ahetele kuli yenu wika, nyi?

³⁷ Nyi umwe malinyonga ngwenyi, nguli mukwa munanyi wa Zambi, hanji nguli ni chawana chize chejile kuli Zambi, anyingike ngwenyi, Shimbi yino ngunasoneka yili ya Mwene Yesu.

³⁸ Alioze, nyi keshi kuyitayiza, Zambi neye kechi kumutayiza.

³⁹ Kashika, akwetu, likolezenu ni kuhanjika munanyi, alioze kanda nukanjisa atu ha kuhanjika maliji waze kaanyingikine.

⁴⁰ Chatamba kulinga yuma yeswe kanawa ni vumbi ngwe chinalite.