1 Korintu 13 - Mukanda Wa Zambi 1970

Zango

¹ Chibwe munguhasa kuhanjika maliji waze Chanyingikine, hanji ja atu, hanji ja tunganda a mwilu, alioze nyi Chishi zango, kuhanjika chami muchibwa chamokomoko, ngwe liji lia ngunga lize liakuhanjika: “Ngoong, ngoong!”

² Chibwe mungubwa ni chawana cha Mwiku wa Linanga cha kuhanjika munanyi, chibwe mungubwa ni yinyingi yeswe, hanji ni ufulielo wa kututulula milundu, alioze nyi Chishi zango, nguli wamokomoko.

³ Chibwe mungupangila yuma yeswe yize nguli nayo, chibwe mungukunjika mujimba wami awoche, alioze nyi Chishi zango, yize yeswe kuyahashile kungukwasa nichimwe.

⁴ Mukwa zango uhomboloji akwete, utu akwete, keshi kubwa ni lufwachinda, keshi kulisamba, keshi kulengumuka.

⁵ Mukwa zango keshi kulinga chize kuchalitele, keshi kufupa yuma yenyi mwene, keshi kutenuka nikawashi, keshi kufunga kole.

⁶ Keshi kuwahilila mu uhenge, alioze kakuwahilila mu umwenemwene.

⁷ Mukwa zango keshi kuhonga nichimwe: kakufuliela, kakusa mbunge ku yuma yize muyizaho; kali chihomboloji.

⁸ Zango kuliahashile kuhwa. Kuhanjika munanyi kumuchikahwa. Chawana cha Mwiku wa Linanga cha kuhanjika maliji waze mutu iye mwene kaanyingikine, muchikahwa. Yinyingi muyikahwa.

⁹ Mumu tunanyingika Chihanda wika, ni tunahase kuhanjika munanyi Chihanda wika.

¹⁰ Alioze muze cha muwundu muchikeza, chize cha Chihanda muchikahwa.

¹¹ Muze nabwile kanuke, te nakuhanjika ngwe kanuke, te nakunyonga ngwe kanuke, te nakushinginyeka ngwe kanuke. Alioze haliabwila muze hinabwa mukulwana, hinehuka yuma yeswe ya wanuke,

¹² Haliabwila yize tunamono yinalifu ni chizulie chize twakumona mu katalilo, alioze ha tangwa lize mutukamumona meso ni meso. Haliabwila ngunanyingika Chihanda, alioze ha tangwa lize mungukanyingika liakulu ngwe chize Zambi anangunyingika liakulu.

¹³ Haliabwila yuma yitatu tuli nayo: kusa mbunge ku yuma yize muyikezaho, ni ufulielo, ni zango. Alioze hakachi ka yino yitatu, chize chahiana chili zango.