1 Korintu 12 - Mukanda Wa Zambi 1970

Yawana yize Mwiku wa Linanga akuhana

¹ Akwetu, haliabwila ngunahanjika hakutwala ku yawana yize Mwiku wa Linanga akuhana. Chazangile yenu kwalajala.

² Nunanyingika ngwenu, muze te kanda nuchifuliela, mahamba waze keeshi kuhanjika te kaakunuyula ni kunupiangula.

³ Chanutamba kunyingika ngwenu, yoze Mwiku wa Zambi wakusongwela kahashile kwamba ngwenyi: “Yesu ashingiwe!” Nawa, niumwe mahasa kwamba ngwenyi: “Yesu kali mwe Mwene,” nyi Mwiku wa Zambi kuwamusongwelele.

⁴ Yawana ya Mwiku wa Linanga yili yeka ni yeka, alioze Mwiku umuwika lume wakuyihana.

⁵ Majila eka ni eka aliko ha kulingila Mwene, alioze Mwene kali umuwika lume.

⁶ Mana a kulinga milimo yeka ni yeka aliko, alioze Zambi kali umuwika yoze wakuhana kuli mutu ni mutu mana a kulinga milimo yeswe.

⁷ Zambi hanahane kuli mutu ni mutu chawana cha Mwiku wenyi ha kuwahisa atu eswe.

⁸ Mwiku wa Linanga wakuhana liji lia mana kuli umwe. Kuli mukwo, Mwiku uzewene wakuhana liji lia yinyingi.

⁹ Mwiku uzewene umuwika wakuhana ufulielo kuli umwe, kuli mukwo tachi ja kuwuka mieji.

¹⁰ Wakuhana kuli umwe tachi ja kulinga yipupu, kuli mukwo mana a kuhanjika munanyi. Kuli mutu mukwo, nawa, wakuhana mana a kunyingika Mwiku wamwenemwene ni uze wa mahuza. Kuli umwe, Mwiku wakuhana yinyingi ya kuhanjika maliji waze kaanyingikine ko, ni kuli mukwo yinyingi ya kulumbununa e maliji.

¹¹ Alioze Mwiku uli umuwika uze wakulinga yize yeswe. Kuwakuhana yawana yeka ni yeka kuli mutu ni mutu cheswacho wakuzanga.

Mujimba umuwika yihanda yinji ukwete

¹² Mumu Kristu kali ngwe mujimba umuwika uze ukwete yihanda yinji. Alioze chibwe ukwete yihanda yinji, hindu mujimba umuwika.

¹³ Chimuwika nawa, yetu eswe, Ayuda ni waze hi Ayuda ko, ndungo ni enyaho, hanatupapachisa ni Mwiku umuwika hanga tubwe mujimba umuwika. Yetu eswe hanatunwisa kuli Mwiku umuwika.

¹⁴ Mujimba kuushi Chihanda chimuwika wika, alioze yihanda yinji.

¹⁵ Chibwe kulu muliamba ngwenyi: “Hi nguli kwoko ko, kashika hi nguli Chihanda cha mujimba ko,” hindu lili Chihanda cha mujimba.

¹⁶ Chibwe litwi muliamba ngwenyi: “Hi nguli kulu ko, kashika hi nguli Chihanda cha mujimba ko,” hindu lili Chihanda cha mujimba.

¹⁷ Nyi mujimba weswe wabwa lume liso, ngwe kuchi muuhasa kwivwa? Nyi uli kwivwa wika, ngwe kuchi muuhasa kuhumbika?

¹⁸ Alioze Zambi hanase Chihanda ni Chihanda mu mujimba ngwe chize apalile.

¹⁹ Nyi te mujimba uli Chihanda chimuwika lume, mujimba muuhasa kubwa, nyi ka?

²⁰ Alioze yihanda yinji yiliko mu mujimba umuwika.

²¹ Liso kuliahashile kwambila kwoko ngwenyi: “Chikusolo”! Chibwe mutwe kuwahashile kwambila molu nichimwe ngwenyi: “Chinusolo”!

²² Ka lume! Alioze yihanda ya mujimba yize twakumona ngwe yilelu, yenayo yilemu.

²³ Yize twakulelesa, yenayo te akufunga kuhiana yize yikwo. Nawa, yihanda yize yikwete sonyi ha kuyimona, yenayo twakufuka kuhiana

²⁴ yihanda yibema ya mijimba yetu. Zambi hanase yihanda ya mijimba yetu, hanga tulemese kuhiana yihanda yize kuyishi ulemu.

²⁵ Chenacho uhandunwino wakuhi mu mujimba, alioze yihanda yeka ni yeka yakulinyongena ni yikwo.

²⁶ Nyi Chihanda chimuwika cha mujimba chinamono lamba, yihanda yeswe muyimona lamba nawa. Nyi kaanachichimieka Chihanda chimuwika cha mujimba, yihanda yeswe muyiwahilila nawa.

²⁷ Yenu eswe nuli mujimba wa Kristu, mutu mweswe kali Chihanda chimuwika cha mujimba uze.

²⁸ Mu Chikungulwila, mutu mweswe Zambi hanamwehe milimo yenyi: hatangu tunganda twa Yesu, wa muchaali akwa munanyi, wa muchitatu alongeshi, mba akwo waze akulinga yipupu, mba waze Zambi hanaahe tachi ja kuwuka mieji, hanji kukwasa, hanji kusongwela atu, hanji kuhanjika maliji waze kaanyingikine ko.

²⁹ Eswe kaali tunganda twa Yesu, nyi? Hanji akwa munanyi, nyi? Eswe kali ni tachi ja kulinga yipupu, nyi?

³⁰ Hanji ja kuwuka misongo, nyi? Hanji ja kuhanjika maliji waze atu kaanyingikine, nyi? Hanji ja kulumbununa e maliji, nyi?

³¹ Ka lume! Alioze fupenu yawana ya Mwiku wa Linanga yize yinahiana. Tala mungunulweza haliabwila yize yinahiana yawana yino.