1 Korintu 11 - Mukanda Wa Zambi 1970

¹ Ngwimbululenu, ngwe chize yami nawa nakwimbulula Kristu.

Kuwayila cha pwo ni lunga mu Chikungulwila

² Nakunuchichimieka, mumu matangwa eswe nwakungwiwuluka ni nwakwononokena longeso lize nanuhele.

³ Alioze ngunazange nunyingike ngwenu, Kristu kali mwata wa atu eswe, lunga kali mwata wa pwo lienyi, ni Zambi kali mwata wa Kristu.

⁴ Mweswe lunga yoze wakuwayila hanji wakwambujola maliji a Zambi mu Chikungulwila, nyi kakufuka mutwe wenyi, lunga yoze kakulelesa Kristu, mwata wenyi.

⁵ Nawa, mweswe pwo yoze wakuwayila hanji wakuhanjika munanyi mu Chikungulwila, nyi keshi kufuka mutwe wenyi, pwo yoze kakulelesa lunga, mwata wenyi. Kulisa chakuhi hakachi ka pwo yoze ni yoze hatewula kambu.

⁶ Nyi pwo keshi kufuka mutwe, chinalite kutewula kambu jenyi jeswe. Nyi chili sonyi pwo kutewula kambu jenyi, chamutamba kufuka mutwe wenyi.

⁷ Lunga kuchamutambile kufuka mutwe, mumu kali chizulie cha uhenya wa Zambi. Alioze pwo kali uhenya wa lunga,

⁸ mumu lunga kakatukile ko kuli pwo, alioze pwo wakatukile kuli lunga.

⁹ Nawa, Zambi katangile ko lunga mumu hali pwo, alioze yatanga pwo mumu hali lunga.

¹⁰ Kashika, mumu hali tunganda a mwilu, pwo chamutamba kufuka mutwe wenyi ha kulweza ngwo, kali mu chiyulo cha lunga lienyi.

¹¹ Alioze mu kuliendela chetu ni Mwene Yesu, pwo kahashile kubwa ukawenyi shina ni lunga, ni lunga kahashile kubwa ukawenyi shina ni pwo.

¹² Mumu ngwe chize pwo yakatuka kuli lunga, chimuwika nawa lunga kakukatuka kuli pwo, ni yuma yeswe yakukatuka kuli Zambi.

¹³ Chibatulenu yenwene, chinalite pwo kuwayila Zambi mu Chikungulwila nyi kafukile ko mutwe?

¹⁴ Chibwe ndako ya chisemewa yinanulweze ngwo, chili sonyi nyi lunga kali ni kambu jisukujisuku.

¹⁵ Alioze kuli pwo jili uhenya. Zambi hanahane kambu jisukujisuku kuli pwo ha kufuka mutwe.

¹⁶ Alioze, nyi umwe mazanga kuhamika ha chikuma chino, kumbululo liami ngwami, yetu ni Yikungulwila ya Zambi kutushi Shimbi jikwo.

Mesa ya Mwene Yesu

¹⁷ Hakutwala ku yuma yize ngunambe kwamba haliabwila, chahashile kunuchichimieka, mumu kulikungulula chenu chili chibi, hi chibema ko.

¹⁸ Chikuma chitangu, hingunevu ngwo, muze nwakulikungulula hamuwika mu Chikungulwila, nwakulihandununa. Kota ni yami ngunachifuliela.

¹⁹ (Chamwenemwene chinalite uhandunwino ubwe hakachi kenu, hanga nunyingike waze ali ni manyonga analite.)

²⁰ Mumu, muze nwakulikungulula mu Chikungulwila, yakulia yize nwakulia, hi ya Mwene Yesu ko.

²¹ Mumu, muze nwakulia, mutu mweswe kanande yakulia yenyi mwene, keshi kushimbwila mukwo. Ha chino, amwe kaakwivwa zala, akwo kaakuzengewa.

²² Kuma kunushi mazuwo a kulila ni kunwina mo, nyi? Nunazange kulelesa Chikungulwila cha Zambi hanji kukolesa yiswale sonyi, nyi? Kuchi nunazange ngunulweze ha chikuma chino? Nunazange ngunuchichimieke, nyi? Alioze ka, chahashile kunuchichimieka!

²³ Mumu longeso lize nanuhele nalitambwile kuli Mwene Yesu. Lino ngwami, ufuku uze Yudase akunjikile Mwene Yesu, Yesu yanda mbolo,

²⁴ yasakwila, yabalula mbolo, mba ngwenyi: “Mbolo yino yili mujimba wami, uze ngunakunjika mumu hali yenu. Lingenu chino ha kungwiwuluka.”

²⁵ Chimuwika nawa, muze halia, yanda musenge, mba yamba ngwenyi: “Musenge uno wa vinyu uli Usendo Waha wa Zambi uze haukolesa ni manyinga jami. Yisuho yeswe mununwa, lingenu chino ha kungwiwuluka.”

²⁶ Mumu yisuho yeswe yize munulia mbolo yino ni mununwa musenge uno munwambujola kufwa cha Mwene Yesu ndoo makeza.

²⁷ Kashika, nyi umwe malia mbolo ya Mwene Yesu hanji manwa musenge wenyi ngwe kuchalitele, kanahi ku mujimba ni manyinga ja Mwene.

²⁸ Chatamba mutu mweswe kulihengula mu mbunge yenyi mwene, mba mahasa kulia mbolo ni kunwa musenge wa Mwene.

²⁹ Mumu, nyi kanyingikine ulumbunwiso wa mujimba wa Mwene muze akulia mbolo ni muze akunwa musenge wa Mwene, kakulihisa.

³⁰ Ha chikuma chino, anji hakachi kenu nuli ni yikola ni mulekeleke, ni amwe haanafu kulu.

³¹ Alioze, nyi hatangu mutulihengula mu mbunge jetu, kachi Zambi kechi kutuhisa.

³² Alioze Zambi kakutubatwila ni kutumwesa lamba, hanga kechi katuhisa hamwe ni akwa hashi.

³³ Kashika, akwetu, muze munukunguluka ku mesa ya Mwene, mutu mweswe chamutamba kushimbwila akwo.

³⁴ Yoze Unevu zala, chamutamba kulila ku mahienyi, hanga muze munukunguluka, Zambi kechi kunumwesa lamba. Hakutwala ku yuma yikwo, mungukayilulika muze mungukanuheta.