1 Korintu 10 - Mukanda Wa Zambi 1970

Kutoweza hakutwala ku kukombelela mahamba

¹ Akwetu, ngunazange nwiwuluke sango ja tushakulu twetu, waze te akukaula Mose. Eswe yaafunga mushi lia lelwa. Eswe yaazauka kalunga lwiji Muchila.

² Eswe yaapapachisa mu lelwa ni mu meya, akabwe tumbaji twa Mose.

³ Eswe yaalia yakulia yimuwika ya uzambi.

⁴ Eswe yaanwa kunwa chimuwika cha uzambi, mumu anwine ku liwe lia uzambi, lize te nakwakaula. Lie liwe Kristu.

⁵ Alioze chibwe chocho, anji hakachi ko kabemenenene ko ku meso ja Zambi. Kashika afwile mu puya.

⁶ Yuma yino yeswe yili yilweza kuli yetu ha kututoweza hanga kutuchi kevwa usolo wa yuma yibi, ngwe ayo evwile.

⁷ Kanda nukombelela mahamba nichimwe ngwe chize alingile amwe a kuli ayo. Ngwe chize Mukanda wa Zambi unambe: “Atu yaatwama ni kunwa ni kulia, mba yaakatuka ha kuhangana.”

⁸ Kanda tulinga utanji, ngwe amwe hakachi ko achilingile, mba yaafwa tununu makumi aali ni atatu ha tangwa limuwika.

⁹ Kanda tweseka Mwene Zambi ngwe chize alingile amwe hakachi ko, mba yaafwa ku kusuma cha manoka.

¹⁰ Kanda tulinyenyeta ngwe chize alingile amwe hakachi ko—mba yoonona eswe kuli Kanganda ka Mwilu.

¹¹ Yuma yino yeswe yaawanyine ngwe yilweza mumu hali atu akwo, mba yayisoneka ha kututoweza, mumu mwaka wakusula hiwakundama.

¹² Yoze Unanyongo ngwenyi, kanamana nguu, chamutamba kukanyama, kuchina malimbuka.

¹³ Nyi kutala ngwe Sakwonga hanweseka, nyingikenu ngwenu, atu eswe kaakweseka chizechene. Alioze Zambi kanalingi nikulita ni chilakenyo chenyi, mumu kechi katayiza Sakwonga akanweseke kuhiana tachi jize nuli najo. Alioze muze makanweseka, shimbu lizeliene makanwaha tachi ja kukumba. Mba munukahasa kukumba.

¹⁴ Kashika, akwetu akwa Kristu, kanda nukombelela mahamba.

¹⁵ Ngunahanjika ni yenu ngwe nuli akwa kukanyama. Nyongenu yenwene yuma yize ngunambe.

¹⁶ Musenge wakuwahisa uze twakunwa muze hitwasakwila Zambi, kuushi kutununga ni manyinga ja Kristu, nyi? Mbolo yize twakubalula, muze twakuyilia, kuyishi kutununga ni mujimba wa Kristu, nyi?

¹⁷ Mbolo yimuwika wika yiliko. Kashika yetu eswe, chibwe tuli anji, tuli mujimba umuwika, mumu yetu eswe twakubalula mbolo yimuwika.

¹⁸ Talenu Aisraele: waze akulia yakulia yize akulambula kuli Zambi ha chilumbilo, keeshi kuliendela hamuwika, nyi?

¹⁹ Yika ngunambe kwamba? Hamba hanji yifwo yize akuhana ku hamba yili yuma, nyi?

²⁰ Ka ngwami! Yakulia yize akwa mavungu akulambula ha chilumbilo, kaakuyilambula kuli mwiku wa luchisa, hi kuli Zambi ko. Chazangile nuliendele ni mwiku wa luchisa.

²¹ Kunwahashile kunwa musenge wa Mwene Yesu, munubwamuze mununwa nawa musenge wa mwiku wa luchisa. Kunwahashile kulia ku mesa ya Mwene, munubwamuze munulia nawa ku mesa ya mwiku wa luchisa.

²² Hanji tunazange kwihia Mwene ku ukwa, nyi? Nunanyongo ngwenu, tunamuhiana tachi, nyi?

Lingenu yuma yeswe ha kuchichimieka Zambi

²³ Amwe kaakwamba ngwo: “Tunahase kulinga yeswe yize tunazange.” Ewa, alioze yeswe hi yibema ko. “Tunahase kulinga yeswe yize tunazange,” alioze yeswe kuyahashile kutukwasa.

²⁴ Niumwe kanda anyonga ha yiwape ya iye mwene, alioze mutu mweswe akanyonge nawa ha yiwape ya atu akwo.

²⁵ Munuhasa kulia yifwo yeswe yize akulanjisa mu yitanda, kuyambashana ka, mumu ha Shimbi ya mu mbunge.

²⁶ Mumu hichinasonewa mu Mukanda wa Zambi ngwo: “Hashi ni yeswe yize yilioho yili ya mbala ya Mwene Zambi.”

²⁷ Nyi umwe hi mukwa Kristu ko kanakutambika ha kulia ku mahienyi, mba unatayiza ha kuya, liako yeswe yize makwaha. Kanda uhula yihula mumu ha Shimbi ya mu mbunge.

²⁸ Alioze, nyi umwe makwamba ngwenyi: “Yifwo yino hayilambula ku mahamba,” kanda uyilia, mumu hali mutu yoze hachamba ni mumu ha Shimbi ya mu mbunge.

²⁹ Shimbi ya mu mbunge yize ngunambe, hi ya yena mwene ko, alioze yize ya mutu mukwo. Umwe mahula ngwenyi: “Kuchi kevwe, Shimbi ya mu mbunge ya mutu mukwo muyingukinda mu kulinga chize ngunazange?

³⁰ Nyi ngunasakwila Zambi ha chize ngunali, kuchi kevwe mangunyinyita ha chikuma cha yakulia yize hinasakwilila Zambi?”

³¹ Chibwe nunali, chibwe nunanu, hanji cheswacho nunalingi, Chilingenu ha kuchichimieka Zambi.

³² Kanda nubwa chitalingiso kuli atu akwo, chibwe Ayuda, chibwe waze hi Ayuda ko, chibwe ku Chikungulwila cha Zambi.

³³ Lingenu ngwe yami. Nakweseka kuwahisa mutu mweswe ha yeswe nakulinga. Chichi kunyonga ha yiwape ya yami mwene, alioze ha yiwape ya atu eswe, ha kwalamwina.