1 Korintu 1 - Mukanda Wa Zambi 1970

Kumeneka

¹ Mukanda uno yami Paulu ni usoko wetu Sostene tunausoneka. Zambi, ku upale wenyi, hanangutambika ha kubwa kanganda ka Kristu Yesu.

² Tunanumeneka akwa Chikungulwila cha Zambi mu limbo lia Korintu. Zambi hananutambika ha kubwa akwa kulinanga. Nwakuliendela hamwe nenyi mu kulinunga ni Kristu Yesu. Tunameneka nawa eswe a kuma kweswe waze akuwayila Zambi mu jina lia Mwene Yesu Kristu, Mwene wo kanda niwetu.

³ Zambi Tata yetu ni Mwene Yesu Kristu anulweze utu ni anwehe uhwimino.

Yiwape yize akuhana Kristu

⁴ Matangwa eswe nakusakwila Zambi yami hakutwala kuli yenu, ha utu uze Zambi anulwezele mu kulinunga ni Kristu Yesu.

⁵ Mumu, mu kulinunga ni Kristu, hinunabichi yuma yeswe: nunahase kulongesa maliji jenyi kanawa, ni nuli ni malinjekela eswe.

⁶ Sango jakutwala kuli Kristu hijinakolo muli yenu.

⁷ Kashika nwakutambula yiwape yeswe, shimbu nwakushimbwila ngwenu, Zambi akasolole Mwene wetu Yesu Kristu.

⁸ Mwenawo makanutakamisa nawa ndoo ku songo. Ha chino, kechi kanuwana ni chitela nichimwe ha Tangwa lia Mwene wetu Yesu Kristu.

⁹ Zambi kali mukwa kushishika, yoze wanutambikile mu kuliendela ni Mwanenyi Yesu Kristu Mwene wetu.

Uhandunwino mu Chikungulwila

¹⁰ Akwetu, ngunaliumbu kuli yenu mu jina lia Mwene wetu Yesu Kristu ngwami, yenu eswe likundenu ha yize nwakuhanjika, hanga uhandunwino kuuchi kubwa hakachi kenu. Likundenu ni nyonga limuwika ni ubatwilo umuwika.

¹¹ Mumu atu ja ku zuwo lia Kloe haanangunyingikisa ngwo, kulihangujola chili hakachi kenu akwetu.

¹² Ngunanwambe chino ngwami, mutu ni mutu hakachi kenu nwakulihanjekela. Umwe ngwenyi: “Yami nguli wa Paulu,” mukwo ngwenyi: “Yami nguli wa Apolo,” ni mukwo ngwenyi: “Yami nguli wa Petulu,” ni mukwo ngwenyi: “Yami nguli wa Kristu.”

¹³ Kristu hanahandunuka, nyi? Yami Paulu nanufwilile ha kulusu, nyi? Hanji anupapachishile mu jina lia Paulu, nyi?

¹⁴ Ngunasakwila Zambi ha chize chapapachishile niumwe hakachi kenu, shina Krispu ni Gayu.

¹⁵ Ha chino, niumwe mahasa kushindakenya ngwenyi, hanamupapachisa mu jina liami.

¹⁶ (Ewa, napapachishile nawa Stefana ni akwa zuwo lienyi, alioze Chanyingikine nyi napapachishile nawa amwe akwo.)

¹⁷ Kristu kangutumine ko ni kupapachisa atu, alioze ni kwambujola Sango Jibema. Kangutumine ko kujambujola ni mana ja atu, kuchina kufwa cha Kristu ha kulusu muchibwa chamokomoko.

Yesu Kristu je ndundo kanda mana ja Zambi

¹⁸ Mumu sango ja kufwa cha Yesu Kristu ha kulusu jili uhepuke kuli akwa kutoka, alioze kuli yetu akulamwina, je ndundo ja Zambi.

¹⁹ Mumu hichinasonewa mu Mukanda wa Zambi ngwo: “Mungukonona mana ja akwa mana. Mungukahepwisa malinjekela ja akwa malinjekela.”

²⁰ Alioze, kuchi hakutwala kuli akwa mana? Kuchi hakutwala kuli waze haanalilongesa chinji? Kuchi hakutwala kuli akwa yinyingi? Zambi kahepwishile ko mana ja mwakono, nyi?

²¹ Mumu Zambi, ni mana jenyi, hanabatula ngwenyi, akwa hashi kaahashile kumunyingika ni mana jo. Alioze hanabatula kulamwina waze akufuliela sango jino ja “uhepuke” jize twakwambujola.

²² Ayuda kaakufupa yilayi, mba afuliele, Agresia kaakufupa mana.

²³ Alioze yetu twakwambujola Kristu yoze ahachile ha kulusu. Sango jino jakutalingisa Ayuda, ni jinamoneka ngwe uhepuke kuli waze hi Ayuda ko.

²⁴ Alioze kuli waze Zambi hanaatambika, Ayuda ni waze hi Ayuda ko, Kristu je ndundo ni e mana ja Zambi.

²⁵ Alioze yize yakumoneka ngwe uhepuke wa Zambi, yinahiana mana ja atu, ni yize yakumoneka ngwe ulelo wa Zambi, yinahiana tachi ja atu.

²⁶ Akwetu, iwulukenu chize nwabwile muze anutambikile Zambi. Nikulita ni manyonga ja atu, akwa mana nwabwile akepe, hanji akwa tachi akepe, hanji atu a lufuma akepe.

²⁷ Alioze Zambi hanatongola yize atu akumona ngwo, ya uhepuke, ha kukolesa sonyi akwa mana. Hanatongola nawa yize yilelu ha kukolesa sonyi akwa tachi.

²⁸ Yuma yize akwa hashi akulelesa ni akunyonga ngwo, yamokomoko, Zambi hanayitongola ha kwonona yize akwa hashi akunyonga ngwo, yilemu.

²⁹ Ha chino, niumwe kechi kalisamba ku meso ja Zambi.

³⁰ Alioze Zambi hananunungu ni Kristu Yesu, hanapwisa Kristu mana jetu. Mwenawo hanatupwisa akwa ululi kanda akwa kulinanga, hanatukulu ku ubinji wa shili.

³¹ Ngwe hichinasonewa mu Mukanda wa Zambi ngwo: “Yoze malisamba, alisambe ni yuma yize Mwene Yesu hanalingi.”