Sona 2 - Chuukese Bible

Sona a iotekin kilisou 2.1-10

¹ Iwe, Sona a iotek ngeni ewe Samol mi Lapalap an we Kot me lon upwen ewe ik. A apasa,

² “Üa köruk, ai Samol mi Lapalap, lon ai riaföü, iwe, ka aüselingaei. Üa siö ngonuk seni lon lenien sotup, nge ka rongorong mweliei.

³ Ka aturueitiu fänilolun lukalapen matau, sät a pwelifeiliei, nge no kana ra tekiatä o pwölüeila.

⁴ Iwe, üa ekieki pwe üa pöüt seni fän mesom. Ifa usun, üpwe chüen tongeni künasefäli imwom imwenfel?

⁵ No kana ra pwölüeila pwe üa ächetä ren, üa nonom fänilolun matau, nge irän lematau ra fitti mökürei.

⁶ Üa kokotiu tori lepopun chuk kana, üa tori eu fanü asaman ra lokola tori feilfeilachök. Iwe, nge en, Samol mi Lapalap ai Kot, ka efieita seni epin fanüfan o amanauaei.

⁷ Lupwen üa mefi pwe üpwe le mäla, üa chechemenuk ai Samol mi Lapalap. Iwe, ai iotek a toruk lon imwom mi pin.

⁸ Iwe, chokewe mi fel ngeni uluulun anümwäl mi lomotongau ra likitukela, en echök mi tongeni ümöümöch ngeniir.

⁹ Nge ngang üpwe kölün kilisou ngonuk, üpwe asor ngonuk o föri mine üa eäni pwon ngonuk. Pun en chök, ai Samol mi Lapalap, ka tufichin angasaei.”

¹⁰ Mürin, ewe Samol mi Lapalap a kapas ngeni ewe ik. Iwe, ewe ik a musäsinätä Sona wilifanü.