Numperis 30 - Chuukese Bible

Allük usun än aramas pwon 30.1-16

¹ Iwe, Moses a üreni ekewe mwänirelan ainangen ekewe aramasen Israel, “Iei usun mine ewe Samol mi Lapalap a allük:

² Are eman mwän a eäni eu pwon ngeni ewe Samol mi Lapalap, pwe epwe fang ngeni och, ika a akapel pwe epwe pölüküela och, ätei esap tongeni atai an pwon. Epwe chök apwönüetä meinisin mine a apasawu seni awan.

³ Nge are eman föpwül mi chüen nom lon imwen saman a eäni eu pwon ngeni ewe Samol mi Lapalap, pwe epwe fang ngeni och, ika a pwon pwe epwe pölüküela och,

⁴ are saman a rongorong an pwon me an akapel, nge esap apasa och ngeni, mürin ewe föpwül epwe föri meinisin mine a eäni pwon.

⁵ Nge are saman we esap tipeeu ngeni lon ewe rän, lupwen a rongorong usun, ewe föpwül esap wisen föri mine a eäni pwon. Iwe, ewe Samol mi Lapalap epwe amusala an tipis, pun saman we esap tipeeu ngeni.

⁶ Nge are neminewe epwe pwüpwülü, lupwen a chüen nom fän an pwon ika fän mine a awakai won,

⁷ are pwülüan epwe rong usun, nge esap apasa och ngeni lon ewe ränin, mürin ewe föpwül epwe föri meinisin mine a eäni pwon.

⁸ Iwe, are pwülüan we esap tipeeu ngeni lon ewe rän, lupwen a rongorong usun, epwe atai än ewe fefin pwon, pwal mine a awakai won. Iwe, ewe Samol mi Lapalap epwe amusala an tipis.

⁹ Nge eman fefin mi mä pwülüan ika eman mi mwü seni pwülüan epwe fokun apwönüetä an kewe pwon meinisin.

¹⁰ Iwe, are eman fefin a eäni eu pwon me lon imwen pwülüan, ika a pwon pwe epwe pölüküela och,

¹¹ are pwülüan a rongorong, nge esap apasa och, esap pwal pälüeni, mürin ewe fefin epwe fokun apwönüetä an kewe pwon meinisin.

¹² Nge are pwülüan a atai ekewe pwon lon ewe rän, lupwen a rongorong usun, meinisin mine ewe fefin a apasawu fän iten an kewe pwon pwal fän iten an akapel esap wisen apwönüetä. Iwe, pwülüan a atai ekewe pwon, nge ewe Samol mi Lapalap epwe amusala än ewe fefin tipis.

¹³ Iteiten pwon me iteiten akapel eman fefin a eäni, pwülüan a tongeni anüküchara ika atai.

¹⁴ Nge are pwülüen ewe fefin esap apasa och ngeni lon ekoch rän, mürin a anüküchara än ewe fefin we pwon me an we akapel meinisin ra nom won. Pwülüan we a anüküchareer, pun esap apasa och ngeni lon ewe rän, lupwen a rongorong usun.

¹⁵ Nge are a ataar ekoch fansoun mürin an rong usur, epwe mwärelong fän än neminewe tipis.”

¹⁶ Ikkei ekewe allükün pwon ewe Samol mi Lapalap a allük ngeni Moses usun lefilen eman mwän me pwülüan, pwal usun lefilen eman sam me nöün föpwül, lupwen a chüen nom lon imwen saman.