Mateus 3 - Chuukese Bible

Än Johannes Soupapatais afalafal 3.1-12

¹ Lon ewe fansoun Johannes Soupapatais a feila ngeni ewe fanüapön Jutea o popuetä le afalafal.

² Iwe, a apasa, “Oupwe aier seni ämi tipis, pun a arap Mwün Läng.”

³ Johannes ätewe ewe soufos Aisea a kapas usun lupwen a apasa, “Eman a kökkö fän leüömong lon ewe fanüapö: ‘Oupwe amolätä alen ewe Samol. Oupwe awenecharala ewe al epwe fetal won.’”

⁴ Johannes a üföüf üf mi för seni ülen kamel, ririn lukalapan a för seni silin man, nge anan mongö lifichimas me chönün chunen seni lein pötöwöl.

⁵ Iwe, aramas ra feito ren seni Jerusalem me unusen ewe fanü Jutea, pwal seni ekewe fanü meinisin ünükün ewe chanpupu Jortan.

⁶ Ra pwärätä ar tipis, nge Johannes a papataisiir lon ewe chanpupu Jortan.

⁷ Nge lupwen Johannes a küna chomongun ekewe Farisi me Satusi mi feito ren pwe repwe papatais, a üreniir, “Ämi serepenit! Iö a ürenikemi pwe oupwe sü seni än Kot song epwe awarato womi?

⁸ Oupwe föri sokun föför epwe pwärätä pwe oua aier seni ämi tipis.

⁹ Ousap ekieki pwe oua tongeni sü seni än Kot song ren ämi apasa, ‘Äm mwirimwirin Apraham’. Pun ngang üpwe ürenikemi, pwe Kot a tongeni angei ekei fau o föri mwirimwirin Apraham seniir!

¹⁰ Ewe kouk a fen molotä pwe epwe pöküela ekewe irä tori warer. Irä meinisin resap uani ua mi mürina repwe pöküpök o koturulong lon ekkei.

¹¹ Ngang üa papataisikemi ren koluk pwe asisilen ämi aier. Nge ewe eman epwe war me müri epwe papataisikemi ren Ngünmifel me ekkei. I a lap seniei, pwe ngang üsap fich ngeni ai üpwe mwo nge uwou ipwan sus.

¹² A kamwöch an söföl usun fook pwe epwe aimwüfeseni ekewe föün wiich seni pöön me won ewe lenien wichiwich umwun wiich. Iwe, epwe ionifengeni ekewe föün wiich o uwalong lon an lenien iseis, nge ekewe pöön epwe keniirela lon ekkei esap kunula.”

Jesus a papatais 3.13-17

¹³ Lon ena fansoun Jesus a feito seni Kalilea o a feila ren Johannes arun ewe chanpupu Jortan, pwe Johannes epwe papataisi.

¹⁴ Nge Johannes a sotuni pwe epwe siwili an we ekiek. Iwe, a üreni, “Ürürün pwe üpwe fen papatais reöm, nge iei en ka feito rei?”

¹⁵ Iwe, Jesus a pölüeni, “Kopwe chök föri met wisom. Pun ren ei sipwe föri meinisin mine letipen Kot.” Iei mine Johannes a tipeeu ngeni.

¹⁶ Iwe, lupwen Jesus a wes me papatais, a müttir ütä me lon ewe koluk. Nge nengeni, läng a sukula ngeni o a küna ewe Ngünün Kot a feitiu won usun lapalapen eman lisom.

¹⁷ Mürin eu möngüngü a möngüngüwu seni läng a apasa, “Iei i nei mi achengicheng, üa unusen pwapwa ren.”