Kölfel 99 - Chuukese Bible

Än Kot allükülük ngeni chon Israel 99.1-9

¹ Ewe Samol mi Lapalap a nemenem. Chon ekewe mwü ra chechech. A mot won an lenien motun king asen ekewe kerop. Fanüfan a chechech.

² Ewe Samol mi Lapalap a tekia me lon Sion, a fokun tekia seni chon ekewe mwü meinisin.

³ Aramas meinisin repwe mwareiti itan mi tekia o eniwokus. Kot a pin.

⁴ En king mi manaman, ka efich pwüng. Ka anüküchara mine a wenechar, ka föri mine a pwüng me wenechar lon Israel.

⁵ Oupwe ingeiti ewe Samol mi Lapalap ach Kot, oupwe fel ngeni me mwen alongolongun pechen. I a pin.

⁶ Iwe, Moses me Aaron ra nom lein nöün kewe souasor, pwal Samuel a nom lein chokewe mi köri itan. Ra iotek ngeni ewe Samol mi Lapalap, nge i a pälüeniir.

⁷ A kapas ngeniir seni lon ewe ürekuchu. Ra aleasochisi an kewe kapasen pwärätä me ekewe allük i a ngeniir.

⁸ Ai Samol mi Lapalap äm we Kot, en ka pälüeni än noum aramas iotek. En eman Kot mi amusala ar tipis, inamwo ika ka apwüngüür ren ar föför mi mwäl.

⁹ Oupwe ingeiti ewe Samol mi Lapalap ach we Kot o fel ngeni me arun chukun we mi pin, pun ewe Samol mi Lapalap ach Kot a pin.