Kölfel 98 - Chuukese Bible

Mwareiti än Kot pwüng 98.1-9

Echö köl.

¹ Oupwe eäni echö köl mi fö ngeni ewe Samol mi Lapalap, pun a föri mettoch mi amwarar. An manaman me an pöchökül mi pin ra afisätä an win.

² Ewe Samol mi Lapalap a asile ngeni aramas an win, a pwärätä an pwüng me fän mesen chon ekewe mwü.

³ A chechemeni an tong ellet me an allükülük ngeni chon Israel. Aramasen fanüfan meinisin ra küna usun än Kot amanaua aramas.

⁴ Oupwe eäni eu mweireiren pwapwa ngeni ewe Samol mi Lapalap, ämi chon fanüfan meinisin. Oupwe chietä echö kölün pwapwa me kölün mwareiti Kot.

⁵ Oupwe kölün mwareiti ewe Samol mi Lapalap fän ükülele, pwal fän sokopaten pisekin ettik.

⁶ Oupwe eäni eu mweireiren pwapwa fän rappwa me puun sewi me fän mesen ewe King, ewe Samol mi Lapalap.

⁷ Ewe matau epwe ngüngü, pwal mönümanau meinisin mi nom lon. Fanüfan epwe köl, pwal aramas meinisin mi nom won.

⁸ Ekewe koluk repwe alopolop, ekewe chuk repwe kölfengen fän pwapwa.

⁹ Repwe köl me fän mesen ewe Samol mi Lapalap, pun epwe feito o apwüngü chon fanüfan. Epwe apwüngü chon ekewe mwü fän pwüng me wenechar.