Kölfel 87 - Chuukese Bible

Feiöchün chokewe mi nonom lon Sion 87.1-7

Echö köl än nöün Kora kewe mwän.

¹ Kot a aüetä an we telinimw won ewe chuk mi pin.

² Ewe Samol mi Lapalap a aücheani Sion lap seni ekewe leni meinisin lon Israel.

³ A eäni pworaus mi amwarar usum, en telinimwen Kot.

⁴ Üpwe makei iten Isip me Papilon lon tettelin ekewe mwü mi aleasochisiei, pwal ekewe chon Filistia me Tirus me Itiopia üpwe alearelong lein chokewe mi imweimw lon Jerusalem.

⁵ Nge usun Sion aramas repwe apasa pwe chon ekewe mwü meinisin repwe nonom lon. Iwe, Ewe mi Unusen Tekia epwe püsin anüküchara ewe telinimw.

⁶ Ewe Samol mi Lapalap epwe angei iteiten ekewe aramas, epwe alearelong meinisin lon iteiten chon ewe telinimw Jerusalem.

⁷ Iwe, ekewe chon köl me chon pworuk ra apasa, “Äm kewe puächen kolukun manau ra nonom lomw.”