Kölfel 75 - Chuukese Bible

Kot a atekisona ekewe aramasangau o atekiatä ekewe chon pwüng 75.1-10

Ngeni ewe mi emweni chon köl: Ei köl usun ngingin ewe köl itan ‘Kosap ataela’. Echö än Asaf köl.

¹ Äm aia kilisou ngonuk, äm Kot, äm aia kilisou ngonuk, lupwen aia köri itom. Aramas ra apworausa om kewe föför mi amwarar.

² Iwe, Kot a apasa, “Üa filätä eu fansoun pwe üpwe eäni kapwüng fän wenechar.

³ Lupwen fanüfan a mwaroro fiti chon meinisin, ngang ewe mi anüküchara longolongun we.

⁴ Üa üreni chokewe mi aingaing, ‘Ousap aingaing.’ Nge üa üreni ekewe aramasangau, ‘Ousap üranang.’

⁵ Ousap üranang ika fos fän lamalamtekia.”

⁶ Pun esap wor eman seni ötiu ika lotou, ika seni ewe fanüapö a tongeni atekiatai eman aramas.

⁷ Nge i Kot ewe mi eäni kapwüng, a asapwilätiu eman, nge a pwal seikätä eman.

⁸ Ewe Samol mi Lapalap a amwöchü eu kap lepöün, a ur ren wain mi pwichikar, iei än Kot song. A ninätiu, nge ekewe aramasangau meinisin won fanüfan ra ünümi. Ra ünümala meinisin tori amüchülan sosoon.

⁹ Nge ngang üpwe asilefeili usun Kot tori feilfeilachök. Üpwe kölün mwareiti än Jakop we Kot.

¹⁰ I epwe ataela pöchökülen ekewe aramasangau, nge epwe awateela pöchökülen ekewe chon pwüng.