Kölfel 70 - Chuukese Bible

Eu iotek pwe Kot epwe angasakich 70.1-5

Ngeni ewe mi emweni chon köl: Echö än Tafit köl fän iten ewe asoren achechem.

¹ Ai Kot, kose mochen kopwe angasaeila. Ai Samol mi Lapalap, kopwe kaito pwe kopwe alisiei.

² Amwo meinisin mi mochen nieila repwe säw o tolong lon fitikoko. Amwo chokewe meinisin mi tipeni ai üpwe feiengau repwe kulsefäl o itengau.

³ Amwo chokewe mi ämängauaei repwe fokun rükö ren ar kuf.

⁴ Nge meinisin mi feito reöm repwe meseik o pwapwa. Chokewe mi aücheani om amanaueer repwe apasafochei, “Kot a tekia.”

⁵ Nge ngang üa wöüngau o osupwang. Ai Kot, kopwe kaito rei. En ai chon alilis me Chon Amanau. Ai Samol mi Lapalap, kosap mang le alisiei.