Kölfel 64 - Chuukese Bible

Eu iotekin tüngor pwe Kot epwe angasala seni ekewe chon oputa 64.1-10

Ngeni ewe mi emweni chon köl: Echö än Tafit köl.

¹ Ai Kot, kopwe aüselingaei, lupwen üa pwäri ngonuk ai osukosuk. Kopwe tümwünü manauei, pun üa niuokus ren chon oputaei,

² kopwe aopaeila seni än ekewe aramasangau rawangauaei, seni ewe mwichen chon föföringau mi akürang.

³ Ra seimi chönawer pwe ra ken usun chök ketilas, ra awena ar kapas mi ngau usun chök föün esefich,

⁴ pwe repwe pekki ätewe esap wor an tipis seni ar lenien op, ra müttir pekki i, nge resap niuokus.

⁵ Ra apöchökülafengeniir lon ar ekiek mi ngau, ra kapas usun ar repwe föri ekewe sär lemonomon o apasa, “Esap wor eman a tongeni künakich?”

⁶ Ra rawangau won mine a pwüngingau o apasa, “Sa ekiekietä eu akot mi unusöch.” Ellet ekiek me leluken aramas ra men atuputup.

⁷ Nge Kot epwe esefichi ngeniir wokun föün esefich pwe repwe müttir kinas.

⁸ Epwe atoto wor feiengau pokiten kapasen awer, nge meinisin mi küneer repwe nünüti mökürer.

⁹ Mürin, aramas meinisin repwe niuokus. Repwe ekieki mine Kot a föri o apworausa usun.

¹⁰ Ekewe chon pwüng repwe pwapwa ren mine ewe Samol mi Lapalap a föri, repwe pwal op ren. Nge ekewe mi wenechar leluker repwe mwareiti.