Kölfel 61 - Chuukese Bible

Apilükülük ren än Kot tümwün 61.1-8

Ngeni ewe mi emweni chon köl: Won pisekin ettik mi wor saitenin. Echö än Tafit köl.

¹ Ai Kot, kopwe rongorong ai siö, kopwe aüselinga ai iotek.

² Üa kökköruk seni lesopun fanüfan, lupwen üa apilükingau. Kopwe emweniei ngeni ewe achau mi tekia seniei.

³ Pun en ai lenien op, ka tümwünüöchüei seni ekewe chon oputaei.

⁴ Kopwe mwüt ngeniei pwe üpwe nom lon imwom mi pin lon unusen manauei, pwe üpwe kinamwe le op fän poum.

⁵ Pun en ai Kot, ka rongorong ai kewe pwon, ka ngeniei wisen chokewe mi meninituk.

⁶ Kopwe alangatamala ränin manauen ewe king. Amwo ierin manauan repwe tori ekewe täppin aramas meinisin.

⁷ Amwo epwe nemenem fän mesom tori feilfeilachök. Ai Kot, kopwe tümwünü ewe king ren om tong ellet me om allükülük.

⁸ Mürin üpwe kölün mwareiti itom fansoun meinisin, lupwen üa apwönüetä ai kewe pwon iteiten rän.