Kölfel 6 - Chuukese Bible

Eu iotekin tüngor ümöümöch lon fansoun riaföü 6.1-10

Ngeni ewe mi emweni chon köl: Won pisekin ettik mi wor walufoch saitenin. Echö än Tafit köl.

¹ Ai Samol mi Lapalap, kosap amiritiei lon om song, kosap pwal apwüngüei lon om lingeringer.

² Kopwe ümöümöch ngeniei, ai Samol mi Lapalap, pun üa fokun pekus. Ai Samol mi Lapalap, kopwe apöchökülaei, pun üa fokun apwangapwang.

³ Ngüni a pwal fokun riaföü. Ai Samol mi Lapalap, ifa ükükün fansoun om kopwe akachopwa ngeniei?

⁴ Ai Samol mi Lapalap, kopwe feito o amanauaei, kopwe angasaei seni mäla ren om we tong ellet.

⁵ Pun chon mäla resap chechemenuk. Esap wor eman epwe mwareituk lon lenien sotup.

⁶ Üa malülü ren ai ngüngü, iteiten pwin kiei a nüküchöchön ren chönün mesei, ai peet a chöchön ren chönün mesei, lupwen üa kechü.

⁷ Mesei a tton ren ai letipeta, a toputopula ren ai kechü pokiten chon oputaei ra ariaföüüei.

⁸ Oupwe sü seniei, ämi meinisin mi föri föför mi ngau. Ewe Samol mi Lapalap a rongorong ai leüömong le kechü.

⁹ Ewe Samol mi Lapalap a rongorong ai tüngorün alilis, ewe Samol mi Lapalap a etiwa ai iotek.

¹⁰ Ekewe chon oputaei meinisin repwe säw o rükö. Repwe kulsefäl o müttir mefi ar itengau.