Kölfel 54 - Chuukese Bible

Eu iotekin tüngor pwe Kot epwe tümwünü nöün aramas seni ekewe chon oputer 54.1-7

Ngeni ewe mi emweni chon köl: Won pisekin ettik mi wor saitenin. Echö än Tafit kölün kait, lupwen ekewe chon Sif ra feila ren Saul o üreni pwe Tafit a op lefiler.

¹ Ai Kot, kopwe amanauaei ren manamanen itom, kopwe aletätä ai pwüng ren om pöchökül.

² Ai Kot, kopwe aüselinga ai iotek, kopwe aü selingom ngeni ai kewe kapas.

³ Pun chon lamalamtekia ra ü ngeniei, ekewe chon mwäneson ra mochen nieila. Ir chokewe resap ekieki Kot.

⁴ Nge Kot ai chon alilis, ewe Samol i chon amwöchü manauei.

⁵ Kot epwe ukun ngeni chon oputaei ar föför mi ngau. Epwe aroserela fän an allükülük.

⁶ Ngang üpwe eäni eu asor ngonuk seni mochenin letipei. Üpwe kilisou ngonuk, ai Samol mi Lapalap, pun en ka kirikiröch.

⁷ En ka angasaei seni ai riaföü meinisin, nge üa pwapwa, lupwen üa küna pwe chon oputaei ra kuf.