Kölfel 53 - Chuukese Bible

Än ekewe aramas umwes me föföringau 53.1-6

Ngeni ewe mi emweni chon köl: Ei köl usun ngingin ewe sokun köl mi mang. Echö än Tafit kölün kait.

¹ Ekewe mi umwes ra ekieki lon leluker, “Esap wor Kot.” Ir ra fokun ngau, ra föri sokun föför mi anioput, esap wor eman a föri mine a pwüng.

² Kot a nennetiu seni läng won aramas meinisin, pwe epwe küna ika a wor eman mi mirit, ika eman mi kütta Kot.

³ Nge ir meinisin ra tokola, ir meinisin ra ingauepök. Esap wor eman a föri mine a pwüng, esap fokun wor eman.

⁴ Ewe Samol mi Lapalap a ais, “Ifa usun, esap wor än ekewe chon föföringau mirit? Ir chokewe mi manau seni mine ra soläni seni nei aramas, nge resap iotek ngeniei.”

⁵ Mürin a toriir niuokus watte, eu niuokus watte esamwo toriir me mwan. Pun Kot epwe atoropasafeili chün chokewe mi oput nöün aramas. Chon Israel repwe fokun akufuur, pun Kot a fen pöütirela.

⁶ Amwo eman epwe feito seni Sion o amanaua chon Israel. Ekewe chon Israel repwe fokun pwapwa, lupwen Kot epwe aliwini ngeniir wöür.