Kölfel 47 - Chuukese Bible

Kot i king won unusen fanüfan 47.1-9

Ngeni ewe mi emweni chon köl: Echö köl än nöün Kora kewe mwän.

¹ Oupwe alopolop ämi chon ekewe mwü meinisin. Oupwe mweireir fän leüömong ren kölün pwapwa.

² Sipwe niuokusiti ewe Samol mi Lapalap, Ewe mi Unusen Tekia, i eman king mi lap a nemeni unusen fanüfan.

³ A asapwilätiu chon ekewe mwü fach o atolonga ekewe mwü fän nemeniach.

⁴ A filätä fän itach ewe fanü sa fanüeni, ewe fanü nöün aramas ra aücheani, ir chokewe Kot a tongeer.

⁵ Kot a feitä ren an lenien motun king fän mweireiren pwapwa, ewe Samol mi Lapalap a feitä fän tikin rappwa.

⁶ Oupwe kölün mwareiti Kot, oupwe kölün mwareiti. Oupwe kölün mwareiti ach king, oupwe kölün mwareiti.

⁷ Pun Kot i kingen unusen fanüfan, oupwe mwareiti i ren echö köl mi pin.

⁸ Kot a nemeni ekewe mwü, Kot a mot won an lenien motun king mi pin.

⁹ Ekewe samolun ekewe mwü ra mwichefengen, ir ewe mwichen aramas nöün än Apraham we Kot. Pun ekewe kingen fanüfan nöün Kot, i a fokun tekia mwer meinisin.