Kölfel 4 - Chuukese Bible

Iotekin lekuniol pwe Kot epwe alilis 4.1-8

Ngeni ewe mi emweni chon köl: Won pisekin ettik mi wor saitenin. Echö än Tafit köl.

¹ Ai Kot, en mi pwüng, kopwe pälüeniei, lupwen üa kökö. Ka fen angasaeila, lupwen üa nom lon riaföü. Kopwe ümöümöch ngeniei o aüselinga ai iotek.

² Ämi aramas, ifa ükükün fansoun ämi oupwe chüen aitengauaei? Ifa ükükün fansoun ämi oupwe aücheani mine a lomotongau o tipeni mine a mwäl?

³ Nge oupwe silei pwe ewe Samol mi Lapalap a aimwüela chokewe mi pwüng fän püsin itan. Ewe Samol mi Lapalap a rongorong, lupwen üa kökköri.

⁴ Are oua song, oupwe afälikemi pwe ousap tipis ren. Oupwe ekieki ei lon lelukemi, lupwen ämi konola lon kiemi fän mosonoson.

⁵ Oupwe eäni sokun asor mi pwüng ngeni ewe Samol mi Lapalap o anomu ämi apilükülük won.

⁶ Chomong aramas ra apasa, “Iö a tongeni fang ngenikich feiöch?” Ai Samol mi Lapalap, kopwe netiu wom o kirikiröch ngenikem.

⁷ Ka fen ngeniei pwapwa mi lap seni än chokewe pwapwa ren kinier wiich me ünümer wain mi somwola.

⁸ Üpwe konola o möür fän kinamwe, pun en echök, ai Samol mi Lapalap, ka tümwünüöchüei.