Kölfel 33 - Chuukese Bible

Kölün mwareiti ewe mi föri o tümwünü läng me fanüfan 33.1-22

¹ Ämi chon pwüng, oupwe köl fän pwapwa ngeni ewe Samol mi Lapalap, A fich ngeni chon wenechar pwe repwe mwareiti i.

² Oupwe mwareiti ewe Samol mi Lapalap ren ükülele, oupwe ettik ngeni won kitar mi wor engol saitenin.

³ Oupwe köl ngeni echö köl mi fö, oupwe ettikiöchü won ekewe pisekin ettik fiti mweireir mi leüömong.

⁴ Pun än ewe Samol mi Lapalap kapas a wenechar, an kewe föför ra fis fän allükülük.

⁵ Ewe Samol mi Lapalap a sani pwüng me let, fanüfan a ur ren an tong ellet.

⁶ Ewe Samol mi Lapalap a afisi ekewe läng ren an kapas, nge akkar, maram me fü kana ra fisitä ren mine a apasa.

⁷ A achufengeni ekewe setin lematau lon eu leni usun lon eu rume, a anomu ekewe matau mi alolol lon lenier usun lon eu imwen iseis.

⁸ Unusen fanüfan epwe niuokusiti ewe Samol mi Lapalap, nge chon fanüfan meinisin repwe meniniti.

⁹ Pun mine a apasa a fisitä, nge mine a allük a pwönüetä.

¹⁰ Ewe Samol mi Lapalap a ataela än chon ekewe mwü akot o pinei än ekewe aramas ekiek.

¹¹ Nge än ewe Samol mi Lapalap akot a nonom tori feilfeilachök, ekiekin lelukan a nonom seni eu täppin aramas tori eu täppin.

¹² Feiöchün ewe mwü mi eäni Kot ewe Samol mi Lapalap, feiöchün ekewe aramas i a filiretä pwe epwe nöüniir.

¹³ Ewe Samol mi Lapalap a nennetiu seni läng, a küna chon fanüfan meinisin.

¹⁴ A nennewu seni an we lenien nemenem o küna aramas meinisin mi nonom won fanüfan.

¹⁵ I ewe mi afisi ekiekin leluker o silei ar kewe föför meinisin.

¹⁶ Eman king esap manau ren watten an mwichen sounfiu, nge eman sounfiu esap ngasala ren an pöchökül mi lapalap.

¹⁷ A solap an eäni apilükülük orisin maun pwe epwe win, pun resap tongeni amanaua eman ren ar pöchökül.

¹⁸ Ewe Samol mi Lapalap a mamasa chokewe mi niuokusiti, pwal chokewe mi apilükülüküni an tong ellet,

¹⁹ pwe epwe angaseer seni mäla o tümwünüür, pwe repwe tongeni manau lupwen fansoun lengita.

²⁰ Sa eäni apilükülük ewe Samol mi Lapalap, pun i ewe chon alisikich a epeti senikich feiengau.

²¹ Ewer, lelukach a pwapwa ren Kot, pun sa lükü itan mi pin.

²² Ai Samol mi Lapalap, om tong ellet epwe nonom wom, usun äm apilükülük a nom womw.