Kölfel 32 - Chuukese Bible

Feiöchün musalan tipis 32.1-11

Echö än Tafit köl. Echö kölün kait.

¹ Feiöchün ätewe an pupungau a musala, nge an tipis a möla.

² Feiöchün ewe aramas ewe Samol mi Lapalap esap tip ngeni och pwüngingau, ewe aramas ese wor chofana lon lelukan.

³ Lupwen üsap pwärätä ai tipis, inisi a apwangapwangala ren ai kechü lon unusen rän me rän.

⁴ Pun lerän me lepwin ka apwüngüei. Pöchökülen inisi a morotä usun koluk a morotä lupwen fansoun pwichikar.

⁵ Mürin üa pwärätä ai tipis ngonuk, nge üsap aopala ai pwüngingau. Üa apasa, “Üpwe pwärätä ngeni ewe Samol mi Lapalap ai pupungau.” Iwe, ka amusala ai tipis meinisin.

⁶ Iei mine ekewe chon allükülük repwe iotek ngonuk lon fansoun riaföü. Lupwen feiengauen apwüng a war usun eu noter, esap toriir.

⁷ En eu lenien op fän itei, ka tümwünüei seni weires. Üa leüömong le köl usun om angasaeila.

⁸ Ewe Samol mi Lapalap a apasa, “Üpwe aiti ngonuk ewe al kopwe fetal won o emwenuk, üpwe öüröürok o mamasok.

⁹ Kosap wewe ngeni eman oris ika eman aas esap mirit, nge eman a chök tongeni nemeniir, are efoch mächä a nom lon awer fiti efoch säl, pwe repwe aleasochis ngeni.”

¹⁰ A wor chomong än ekewe aramasangau riaföü, nge ewe Samol mi Lapalap a tongei o tümwünü chokewe mi anomu ar apilükülük won.

¹¹ Ämi chon pwüng, oupwe pwapwa o meseik ren mine ewe Samol mi Lapalap a föri. Oupwe mweireir fän pwapwa, ämi meinisin mi wenechar lelukemi.