Kölfel 28 - Chuukese Bible

Eu iotekin tüngor alilis me iotekin kilisou 28.1-9

Echö än Tafit köl.

¹ Ai Samol mi Lapalap, en ai achau, üa kökköruk. Kopwe aüselinga ai siö ngonuk. Pun are kosap pälüeniei, üpwe wewe ngeni chokewe mi tolong lon peias.

² Kopwe rongorong kapasen ai tüngor, lupwen üa siö ngonuk. Kopwe alisiei, lupwen üa aitietä pei ngeni imwom mi unusen pin.

³ Kosap apwüngüei fitifengen me ekewe aramasangau, pwal fiti chokewe mi föri föför mi ngau, ir mi eäni kapas pwetete ngeni chon arur, nge ra ekiekingau lon leluker.

⁴ Kopwe ngeniir chappen ar föför me ükükün liwinin ar föföringau. Kopwe ngeniir chappen angangen pöür o liwini ngeniir mine a fichitiir.

⁵ Pokiten ir resap afäli än ewe Samol mi Lapalap föför ika angangen pöün, iei mine i epwe apwüngüür o aroserela.

⁶ Üpwe mwareiti ewe Samol mi Lapalap, pun a rongorong ai tüngorun alilis.

⁷ Ewe Samol mi Lapalap a tümwünüei o epeti seniei feiengau, üa apilükülükü i, nge i a alisiei. Iei mine üa fokun pwapwa. Üpwe kilisou ngeni o kölün mwareiti.

⁸ Ewe Samol mi Lapalap i än nöün aramas pöchökül. I ewe lenien op mi allükülük fän iten nöün we mi kepit ewe king.

⁹ Kopwe amanaua noum kewe aramas o afeiöchü noum kana. Kopwe ar chon mas o tümwünüür tori feilfeilachök.