Kölfel 145 - Chuukese Bible

Kölün mwareiti än Kot kirikiröch me manaman 145.1-21

Echö än Tafit kölün mwareiti Kot.

¹ Üpwe ingemwareiti ai Kot me ai king, üpwe mwareiti itom tori feilfeilachök.

² Iteiten rän üpwe mwareituk o alinga itom tori feilfeilachök.

³ Ewe Samol mi Lapalap a tekia, aramas meinisin repwe fokun mwareiti i. Esap wor eman a tongeni aükü an tekia.

⁴ Eu täppin aramas epwe ainga om kewe angang ngeni pwal eu, repwe arongafeili om kewe föför mi manaman.

⁵ Repwe kapas usun lingen om tekia, nge ngang üpwe ekinlonei usun amwararen om kewe föför.

⁶ Aramas repwe asilefeili manamanen om kewe föför mi eniwokus, nge ngang üpwe arongafeili om tekia.

⁷ Repwe apworausa usun om kirikiröch mi lapalap o osomong le kölü om pwüng.

⁸ Ewe Samol mi Lapalap a kirikiröch o lukpwetete, a songomang o wöün tong ellet.

⁹ Ewe Samol mi Lapalap a kirikiröch ngeni aramas meinisin, an tong a nom won förian meinisin.

¹⁰ Ai Samol mi Lapalap, meinisin mine ka föri repwe kilisou ngonuk, noum chon pin meinisin repwe mwareituk.

¹¹ Repwe kapas usun lingen mwum o apworausa usun om manaman,

¹² pwe aramas meinisin repwe silei om föför mi manaman me amwararen lingen mwum.

¹³ Mwum eu mwü mi nom tori feilfeilachök, nge om nemenem a nonom won ekewe täppin aramas meinisin. Ewe Samol mi Lapalap a allükülük lon an pwon meinisin, a eäni ümöümöch ngeni förian meinisin.

¹⁴ Ewe Samol mi Lapalap a aütäi ir meinisin mi turula, a awenätä sokürün ir mi pworotiu.

¹⁵ Mönümanau meinisin ra nennetä ngonuk fän ar apilükülük, pun en ka ngeniir ener mongö, lupwen a tori otun.

¹⁶ Ka suki poum o ngeni ekewe mönümanau meinisin mine repwe menemenöch ren.

¹⁷ Ewe Samol mi Lapalap a pwüng lon meinisin mine a föri o kirikiröch lon an kewe föför meinisin.

¹⁸ Ewe Samol mi Lapalap a arap ngeni ir meinisin mi köri, a arap ngeniir meinisin mi köri fän wenechar.

¹⁹ A föri mochenin ir meinisin mi niuokusiti i, a rong ar siö o amanaueer.

²⁰ Ewe Samol mi Lapalap a tümwünü meinisin mi echeni i, nge a arosala ekewe aramasangau meinisin.

²¹ Üpwe mwareiti ewe Samol mi Lapalap, mönümanau meinisin repwe mwareiti itan mi pin tori feilfeilachök.