Kölfel 142 - Chuukese Bible

Eu iotekin tüngor alilis lon riaföü 142.1-7

Echö än Tafit kölün kait, lupwen a nom lon ewe föimw. Eu iotek.

¹ Üa siö ngeni ewe Samol mi Lapalap fän leüömong, üa alapätä mweliei o tüngor ngeni pwe epwe ümöümöch ngeniei.

² Üa uwato ren ai letipengau meinisin o asile ngeni ai kewe riaföü.

³ Lupwen üa apilükingau, i a fen silei mine üpwe föri. Ekewe chon oputaei ra aopala eu sär fän itei lon ewe al ia üa fetal ie.

⁴ Lupwen üa nennela lepelifichi, üa küna pwe esap wor eman a alisiei, esap wor ai lenien op, esap wor eman a tümwünüei.

⁵ Ai Samol mi Lapalap, üa siö ngonuk. Üa üra: En ai lenien op me ineti me lon fanüen chon manau.

⁶ Kopwe afäli ai siö, pun üa fokun apilükingau. Kopwe angasaei seni ekewe chon ariaföüüei, pun ra kon pöchökül ngeniei.

⁷ Kopwe angasaeila seni lon ewe lenien fötek, pwe üpwe tongeni mwareiti itom. Mürin, ekewe chon pwüng repwe mwicheto rei, pokiten ka afeiöchüei.