Kölfel 136 - Chuukese Bible

Mwareiti än Kot tong ellet 136.1-26

¹ Oupwe kilisou ngeni ewe Samol mi Lapalap, pun i a kirikiröch, an tong ellet a nonom tori feilfeilachök.

² Oupwe kilisou ngeni ewe Kot mi tekia seni ekewe kot meinisin, an tong ellet a nonom tori feilfeilachök.

³ Oupwe kilisou ngeni ewe Samol mi tekia seni ekewe samol meinisin, an tong ellet a nonom tori feilfeilachök.

⁴ Ewe Samol mi Lapalap i chök ewe mi föri ekewe manaman mi amwarar, an tong ellet a nonom tori feilfeilachök.

⁵ I ewe mi föri ekewe läng ren an silelap, an tong ellet a nonom tori feilfeilachök.

⁶ A anomu fanüfan won ekewe koluk, an tong ellet a nonom tori feilfeilachök.

⁷ A föri ekewe saram mi watte, an tong ellet a nonom tori feilfeilachök:

⁸ ewe akkar pwe epwe tin lerän, an tong ellet a nonom tori feilfeilachök,

⁹ ewe maram me ekewe fü pwe repwe tin lepwin, an tong ellet a nonom tori feilfeilachök.

¹⁰ Iwe, i a niela ekewe mwänichien Isip, an tong ellet a nonom tori feilfeilachök.

¹¹ A emwenawu chon Israel seni Isip, an tong ellet a nonom tori feilfeilachök,

¹² ren pöün mi manaman o aköüpöü, an tong ellet a nonom tori feilfeilachök.

¹³ A aimwüfeseni ewe Setipar lon ruu kinikin, an tong ellet a nonom tori feilfeilachök,

¹⁴ pwe chon Israel repwe pwerela lukalapan, an tong ellet a nonom tori feilfeilachök.

¹⁵ Nge a aturalong Farao me nöün mwichen sounfiu lon ewe Setipar, an tong ellet a nonom tori feilfeilachök.

¹⁶ A emweni nöün kewe aramas lon ewe fanüapö, an tong ellet a nonom tori feilfeilachök.

¹⁷ A niela ekewe king mi lap, an tong ellet a nonom tori feilfeilachök.

¹⁸ A pwal niela ekewe king mi iteföüla, an tong ellet a nonom tori feilfeilachök:

¹⁹ Sihon ewe kingen chon Amor, an tong ellet a nonom tori feilfeilachök,

²⁰ me Ok ewe kingen Pasan, an tong ellet a nonom tori feilfeilachök.

²¹ A ngeni chon Israel fanüer pwe repwe fanüeni, an tong ellet a nonom tori feilfeilachök,

²² a ngeni Israel nöün we chon angang ekewe fanü pwe epwe fanüeni, an tong ellet a nonom tori feilfeilachök.

²³ I ewe mi chechemenikich lon ach tekison, an tong ellet a nonom tori feilfeilachök,

²⁴ o chimanükich seni chon oputach, an tong ellet a nonom tori feilfeilachök.

²⁵ A amongöni mönümanau meinisin, an tong ellet a nonom tori feilfeilachök.

²⁶ Oupwe kilisou ngeni ewe Koten läng, an tong ellet a nonom tori feilfeilachök.