Kölfel 129 - Chuukese Bible

Eu iotek pwe chon oputen Sion repwe kuf 129.1-8

Echö kölün feitä.

¹ Israel epwe apasa, “Chon oputaei ra fokun ariaföüüei seni leküküni.

² Ewer, ra fokun ariaföüüei seni leküküni, nge resap tongeni akufuei.

³ Ra akinasa söküri pwe a fokun watte kinasan, usun chök eman chon tuw pwül a tuw warawar mi langatam.

⁴ Nge ewe Samol mi Lapalap a pwüng. I a angasaei seni än ekewe aramasangau fötekiniei.

⁵ Amwo meinisin mi oput Sion repwe timär fän säw.

⁶ Amwo repwe wewe ngeni fetil won osun ekewe imw mi pwasala me mwen an märitä,

⁷ ewe chon kinikin esap tongeni amasoua pöün ren, nge ewe chon föri pilük esap tongeni pilükü o efiti.

⁸ Nge chokewe mi pwerela resap apasa ngeniir, “Än ewe Samol mi Lapalap feiöch epwe nom womi. Äm aia afeiöchükemi fän iten ewe Samol mi Lapalap.”