Kölfel 128 - Chuukese Bible

A feiöch eman mi niuokusiti Kot 128.1-6

Echö kölün feitä.

¹ Ra feiöch ir meinisin mi niuokusiti ewe Samol mi Lapalap, chokewe mi aleasochisi an kewe allük.

² Kopwe mongö uän angangen poum, kopwe pwapwa o feiöch.

³ Pwülüom epwe wewe ngeni efoch irän wain mi fokun ua me lon imwom. Noum kana repwe wewe ngeni fasaren ewe irä olif ünükün om chepel.

⁴ Iei usun feiöchün ewe mwän mi niuokusiti ewe Samol mi Lapalap.

⁵ Ewe Samol mi Lapalap epwe afeiöchuk seni Sion. Amwo kopwe küna feiöchün Jerusalem lon ränin manauom meinisin.

⁶ Amwo kopwe küna nöün noum kana. Kinamwe epwe nom won Israel.