Kölfel 123 - Chuukese Bible

Eu iotekin tüngor ümöümöch 123.1-4

Echö kölün feitä.

¹ Üa netä reöm, ai Samol mi Lapalap, en ewe mi mot won ewe lenien motun king lon läng.

² Usun mesen ekewe chon angang mwän ra netä ren ar samol, pwal usun mesen eman chon angang fefin a netä ren an samol fefin, iei usun mesach ra netä ren ewe Samol mi Lapalap ach we Kot, tori epwe ümöümöch ngenikich.

³ Kopwe ümöümöch ngenikem, äm Samol mi Lapalap, kopwe ümöümöch ngenikem. Pun a kon watte än aramas aitengauakem.

⁴ A kon langatam fansoun äm riaföü ren än ekewe mi wöümong esitakem, pwal ren än ekewe mi lamalamtekia aitengauakem.