Kölfel 120 - Chuukese Bible

Eu iotekin tüngor ngasala seni chon atuputup 120.1-7

Echö kölün feitä .

¹ Üa siö ngeni ewe Samol mi Lapalap lon ai riaföü, nge i a pälüeniei,

² “Ai Samol mi Lapalap, kopwe angasaei seni ekewe chon chofana me chon atuputup.”

³ Ämi chon atuputup, met Kot epwe liwini ngenikemi? Met epwe pwal föri ngenikemi?

⁴ Epwe apwüngükemi ren än eman sounfiu föün esefich mi ken, ren moochen chia mi sarara.

⁵ Feiengauei pwe üa siamüfetal lon Mesek o nonom lon imwen ekewe chon Ketar.

⁶ A fansoun langatam ai imweimw lein chokewe mi oput kinamwe.

⁷ Üa tipeni kinamwe. Nge lupwen üa kapas usun, ir ra tipeni maun.