Kölfel 12 - Chuukese Bible

Iotekin tüngor alilisin ngas seni ekewe aramasangau 12.1-8

Ngeni ewe mi emweni chon köl: Won pisekin ettik mi wor walufoch saitenin. Echö än Tafit köl.

¹ Äm Samol mi Lapalap, kopwe alisikem, pun esap chüen wor eman chon pin, nge ekewe chon allükülük ra rosola seni lein aramas.

² Iteiten eman me eman a chofana ngeni chon arun. Ra chök eäni kapas atuputup lefiler.

³ Amwo ewe Samol mi Lapalap epwe aükätiu ar kapas atuputup o pineela awen ekewe aramas mi tunesikesikemong.

⁴ Ir chokewe mi apasa, “Sa win ren ach kapas, nge kapasen awach a alisikich. Iö epwe tongeni nemenikich?”

⁵ Nge ewe Samol mi Lapalap a üra, “Iei ngang üpwe feito, pokiten ekewe chon wöüngau ra osupwang, pwal ekewe chon mwelele ra ngüngü. Ngang üpwe alenier lon ewe lenien kinamwe ra älälei.”

⁶ Än ewe Samol mi Lapalap kewe pwon ra allükülük o fatafatöch, usun silifer a kurufat me lon ewe lenien um lepwül, lupwen a ketel fän fisu pwe epwe limöch.

⁷ Äm Samol mi Lapalap, kopwe amwöchükem, kopwe tümwünükem fansoun meinisin seni ei täppin aramas mi ngau.

⁸ Pun ekewe aramasangau ra nom ekis meinisin, nge aramas meinisin ra pwapwaiti mine a ngau.