Kölfel 114 - Chuukese Bible

Ekewe manaman mi fis, lupwen chon Israel ra towu seni Isip 114.1-8

¹ Lupwen ekewe chon Israel ra towu seni Isip, ir ekewe mwirimwirin Jakop mi towu seni eu mwichen aramas mi sokola ar fos,

² Juta a wiliti an leni mi pin, Israel a wiliti an lenien nemenem.

³ Ewe matau a küna mine a fis o süla, ewe chanpupu Jortan a üla.

⁴ Ekewe chukutekia ra mwetemwet usun ekewe ätemwänin sip, ekewe chukutekison ra mwetemwet usun ekewe nienifön sip.

⁵ Met o sät, pwota ka sü? Met o chanpupu Jortan, pwota ka üla?

⁶ Met o ämi kewe chukutekia, pwota oua mwetemwet usun ekewe ätemwänin sip? Nge ämi chukutekison, pwota oua mwetemwet usun ekewe nienifön sip?

⁷ En fanüfan, kopwe chechech me fän mesen ewe Samol, me fän mesen än Jakop we Kot,

⁸ i ewe mi awili ewe achau ngeni eu nomun koluk, nge ewe achau mi fokun pöchökül ngeni eu puächen koluk.