Kölfel 113 - Chuukese Bible

Kölün mwareiti Kot pokiten an atekiatä ewe chon tipetekison 113.1-9

¹ Ousipwe mwareiti ewe Samol mi Lapalap. Ämi chon angang ngeni ewe Samol mi Lapalap oupwe mwareiti itan.

² Oupwe mwareiti iten ewe Samol mi Lapalap seni ei fansoun tori feilfeilachök.

³ Seni tötän akkar tori a tuputiu aramas repwe mwareiti iten ewe Samol mi Lapalap.

⁴ Ewe Samol mi Lapalap a tekia seni chon ekewe mwü, an ling a nom asen ekewe läng.

⁵ Ese wor eman a wewe ngeni ewe Samol mi Lapalap ach we Kot. A mot won an lenien mot mi tekia,

⁶ nge a nennetiu won ekewe läng, pwal won fanüfan.

⁷ A apwätai ekewe chon wöüngau seni lepwül o atekiatäi ekewe chon mwelele seni ioien falang,

⁸ a amoteer ren ekewe samol, ren ekewe samolun nöün aramas.

⁹ A aleniöchü ewe fefin mi rit lon imwan o föri pwe epwe eman inelap mi pwapwa ren nöün kewe. Ousipwe mwareiti ewe Samol mi Lapalap.