Kölfel 112 - Chuukese Bible

A feiöch eman mi niuokusiti Kot 112.1-10

¹ Ousipwe mwareiti ewe Samol mi Lapalap. A feiöch ewe aramas mi niuokusiti ewe Samol mi Lapalap, mi pwapwaiti an epwe aleasochisi an kewe allük.

² Nöün kana repwe nemenem lon ewe fanü. Mwirimwirin kana mi wenechar repwe feiöch.

³ Wöü me chomong pisek ra nom lon imwan, nge an pwüng a nonom tori feilfeilachök.

⁴ Saram a tin lon rochopwak fän iten ewe mi wenechar. Pun ewe Samol mi Lapalap a kirikiröch, a pwal ümöümöch o pwüng.

⁵ A feiöch eman mwän mi kichiöch o mwütätä mettoch, eman mi föri an angang fän pwüng.

⁶ Pun ewe chon pwüng epwe fokun tipepos. Aramas repwe chechemeni i tori feilfeilachök.

⁷ Esap niuokusiti pworaus mi ngau, lelukan a pos, a apilükülükü ewe Samol mi Lapalap.

⁸ Lelukan a kinamwe, esap niuokus. Lesopolan epwe pwapwa le küna än chon oputan kuf.

⁹ A fangafangöch ngeni ekewe chon wöüngau, an pwüng epwe nonom tori feilfeilachök. Epwe wor manan me meninin me ren aramas.

¹⁰ Ekewe aramasangau ra küna ei o song ren, ra attina meser, nge mürin resap chüen nom. Än ekewe aramasangau mochen esap pwönüetä.