Kölfel 111 - Chuukese Bible

Aramas repwe mwareiti Kot 111.1-10

¹ Ousipwe mwareiti ewe Samol mi Lapalap. Üpwe kilisou ngeni ewe Samol mi Lapalap ren unusen lelukei lon ewe mwichen chon wenechar, pwal lein ewe mwichen aramas.

² Än ewe Samol mi Lapalap föför ra fokun amwarar, chokewe meinisin mi pwapwaitiir ra ekinloneer.

³ An kewe föför ra fokun ling me manaman, an pwüng a nonom tori feilfeilachök.

⁴ Ewe Samol mi Lapalap a föri pwe aramas repwe chechemeni an kewe föför mi amwarar. A eäni kirikiröch o ümöümöch.

⁵ A ngeni chokewe mi niuokusiti i ener mongö. A chechemeni an we pwon fansoun meinisin.

⁶ A pwäri ngeni nöün kewe aramas manamanen an kewe föför, lupwen a ngeniir fanüen chon ekewe mwü.

⁷ A allükülük o pwüng lon mettoch meinisin a föri. An kewe allük meinisin ra nükünük.

⁸ Ra nonomopos tori feilfeilachök, Kot a föriir fän allükülük me wenechar.

⁹ A angasala nöün aramas o föri eu pwon esemüch. Itan a pin o eniweniu.

¹⁰ Niuokusiti ewe Samol mi Lapalap, iei poputän tipachem. Chokewe meinisin mi föri iei usun ra fefeitä lon ar silelap. Sipwe mwareiti Kot tori feilfeilachök.