Kölfel 110 - Chuukese Bible

Kot a ngeni ewe king an nemenem 110.1-7

Echö än Tafit köl.

¹ Ewe Samol mi Lapalap a kapas ngeni ai samol ewe king, “Kopwe mot lepelifichi tori üpwe anomu chon oputom pwe repwe lenien puun pecheöm.”

² Ewe Samol mi Lapalap epwe alapala manen om nemenem lon wisom wisen king seni Sion. A apasa, “Kopwe nemenem won chon oputom.”

³ Lon ränin om kopwe maun ngeni chon oputom noum aramas repwe etuk fän püsin letiper o üföüf ekewe üf mi pin. Usun amurenipwin mi nom lesosorusich, iei usun noum kewe alüal repwe feito reöm.

⁴ Ewe Samol mi Lapalap a pwon fän akapel, nge esap siwili an ekiek, “En eman souasor tori feilfeilachök lon kotun Melkisetek.”

⁵ Ewe Samol a nom lepelifichum. I epwe akufu ekewe king lon ewe rän a lingeringer.

⁶ Epwe eäni kapwüng won chon ekewe mwü. Epwe aura ewe lenien maun ren somä o akufu ekewe king won unusen fanüfan.

⁷ Ewe king epwe ün seni ewe öüwö mi nom ünükün ewe al, epwe pöchökülela ren o sopwela le win.