Kölfel 11 - Chuukese Bible

Än chon wenechar lenien op 11.1-7

Ngeni ewe mi emweni chon köl: Echö än Tafit köl.

¹ Üa anomu ai apilükülük won ewe Samol mi Lapalap pwe epwe tümwünüei. Pwota oua üreniei, “Kopwe sü ngeni ekewe chuk usun eman machang?

² Pun nengeni, ekewe aramasangau ra emeia ar likapich o pachetä wokur föün esefich ngeni selin, pwe repwe likapichi ekewe mi wenechar leluker seni ewe leni mi kiroch.

³ Are ekewe longolongun pwüng ra tala, met eman chon pwüng a chüen tongeni föri?”

⁴ Ewe Samol mi Lapalap a nom lon imwan mi pin, än ewe Samol mi Lapalap lenien motun king a nom lon läng. A netiu won fanüfan o ouwasacha aramas meinisin, a pwal silei mine ra föri.

⁵ Ewe Samol mi Lapalap a sotuni ekewe aramas mi pwüng me ekewe aramasangau, a oput ätewe mi föri föförün mwäneson.

⁶ A apüngätiu molien ekkei me primston won ekewe aramasangau. A apwüngüür ren asepwäl mi pwichikar.

⁷ Pun ewe Samol mi Lapalap a pwüng, a pwapwaäsini föför mi pwüng. Ekewe aramas mi wenechar repwe küna i.