Kölfel 105 - Chuukese Bible

An Kot kewe manaman a föri fän iten chon Israel 105.1-45

¹ Oupwe kilisou ngeni ewe Samol mi Lapalap, oupwe köri itan. Oupwe asilefeili an kewe föför lein chon ekewe mwü.

² Oupwe köl ngeni, oupwe kölün mwareiti i, oupwe apworausa an kewe föför meinisin mi amwarar.

³ Oupwe fokun ingemwareiti itan mi pin. Chokewe mi kütta ewe Samol mi Lapalap repwe meseik.

⁴ Oupwe kütta ämi alilis me ren ewe Samol mi Lapalap, oupwe kütta i fansoun meinisin.

⁵ Oupwe chechemeni ekewe föför mi amwarar a föriir. Oupwe chechemeni an kewe manaman me an kewe kapwüng a eäni,

⁶ ämi mwirimwirin Apraham nöün Kot we chon angang, ämi mwirimwirin Jakop kewe, ätewe mi fil me ren.

⁷ Ewe Samol mi Lapalap i ach we Kot, an kewe allük ra fän iten unusen fanüfan.

⁸ I a chechemeni an we pwon tori feilfeilachök, an we kapas a anüküchara ngeni engeröü täppin aramas.

⁹ A chechemeni ewe pwon a eäni ngeni Apraham, ewe pwon a eäni fän akapel ngeni Isaak.

¹⁰ A anüküchara ewe pwon ngeni Jakop pwe eu allük, pwal eu pwon esemüch.

¹¹ Iwe, a apasa, “Üpwe ngonuk ewe fanü Kanaan pwe fanüom.”

¹² Lupwen nöün Kot kewe aramas ra fokun chokükün, lupwen ra chon siamü lon ewe fanü Kanaan

¹³ o saifetal seni eu fanü tori pwal eu fanü, seni eu mwü tori pwal eu mwü,

¹⁴ Kot esap mwüt ngeni eman pwe epwe ariaföüür. A apwüngü ekewe king pokiter

¹⁵ o apasa, “Ousap atapa nei kewe mi fil, ousap afeiengaua nei kewe soufos.”

¹⁶ Lupwen ewe Samol mi Lapalap a awarato eu lengita won ewe fanü o angei seniir ener mongö meinisin,

¹⁷ a tinala eman mwän itan Josef epwe akom mwer, ätewe ra amömöla pwe epwe eman amanau.

¹⁸ Pechen ra föfö ren selimächä, nge üan a katolong lon efoch ring seni mächä,

¹⁹ tori a fis mine a fen apasa, nge än ewe Samol mi Lapalap we kapas a alletätä pwe a pwüng.

²⁰ Mürin, ewe kingen Isip a tinala eman pwe epwe amusa Josef, ewe mi nemeni ekewe mwü a angasala i.

²¹ A seikätä i pwe epwe samol lon imwan o nemeni mettochun meinisin.

²² Epwe nemenem won nöün kewe samol o aiti ngeni nöün kewe souakom tipachem.

²³ Mürin, Jakop a feila Isip o siamü lon ewe fanü.

²⁴ Nge ewe Samol mi Lapalap a fokun achomonga nöün kewe aramas o apöchöküleer lap seni chon oputeer.

²⁵ A akulu leluken chon Isip, pwe ra oput nöün kewe aramas o eäni rawangau ngeni nöün kewe chon angang.

²⁶ Mürin, Kot a tinala Moses nöün we chon angang me Aaron ätewe i a filätä.

²⁷ Ir ra föri an kewe asisil me manaman me lein ekewe aramas me lon ewe fanü Isip.

²⁸ Kot a tinala rochopwak o arochokichi ewe fanü, nge ekewe chon Isip ra chök ü ngeni an kewe kapas.

²⁹ Iwe, a awili ngeni cha ar kewe koluk, pwe ekewe ikenen lor ra mäla.

³⁰ Fanüer a ur ren kairü, ra mwo nge tolong lon imwen ar we king.

³¹ Kot a kapas, nge ra war chomong pwiin loong, pwal nikken ra nom lemenen fanüer.

³² A apüngätiu wor ütten fau akasiwilin üt, pwal fifi a fi ekis meinisin won fanüer,

³³ Kot a atai ar irän wain me ar irä fiik o atatakisi irän fanüer meinisin.

³⁴ Iwe, a kapas, nge ekewe lifichimas ra war, pwal ekewe kükün lifichimas resap lea.

³⁵ Ra eni meinisin mine a mär me won fanüer o eni uän fotar irä.

³⁶ Iwe, a niela ekewe mwänichi meinisin me lon fanüer, chokewe ra nöüniir lupwen ar pöchökül.

³⁷ Mürin, Kot a emwenawu chon Israel fän silifer me kolt. Esap wor eman me lein chon ar kewe ainang a apwangapwang.

³⁸ Iwe, chon Isip ra pwapwa, lupwen chon Israel ra towu, pun ra fokun niuokusitiir.

³⁹ Kot a anomu eu kuchu wor pwe pwölüpwölür, pwal eu ekkei, pwe epwe asarameer lepwin.

⁴⁰ Ra tüngor, nge i a awarato ekewe machang iter kweil, a ngeniir mongö mi chomong seni läng.

⁴¹ A asangafeseni ewe achau pwe koluk a puwu seni, a pulong lon ewe fanüapö usun eu chapupu.

⁴² Pun Kot a chechemeni an we pwon mi pin a eäni ngeni nöün we chon angang Apraham.

⁴³ Iei mine a emwenawu nöün kewe aramas mi fil fän pwapwa me mweireiren köl.

⁴⁴ Iwe, a ngeniir fanüen chon ekewe mwü, nge ir ra fanüeni ewe fanü o feiöchüni än ekewe aramas angang.

⁴⁵ Ei a fis pwe nöün kewe aramas repwe aleasochisi an kewe pwüüng o apwönüetä an kewe allük. Ousipwe mwareiti ewe Samol mi Lapalap.