Kölfel 101 - Chuukese Bible

Eu pwon usun manau fän pwüng 101.1-8

Echö än Tafit Köl.

¹ Üpwe köl usun allükülük me pwüng. Üpwe köl ngonuk, ai Samol mi Lapalap.

² Üpwe afäliei pwe üsap föri tipis. Inet kopwe feito rei? Üpwe manaueni eu manau mi limöch me lein chon leimwei.

³ Üsap anomu ai ekiek won mettoch mi ngau. Üa oput föförün ekewe chon tipis. Ar föför esap fokun fitipacheitiei.

⁴ Eman mi ulöförea lelukan epwe toau seniei. Üsap fokun efich föför mi ngau.

⁵ Eman mi aitengaua chon arun lemonomon üpwe niela. Eman aramas mi wolamalamtekia o sikesik üsap etiwa.

⁶ Üpwe filätä chokewe mi allükülük lon ewe fanü pwe repwe nom rei. Chokewe mi fokun wenechar repwe angang ngeniei.

⁷ Esap wor eman mi föri föförün atuputup epwe nom lon imwei, nge eman mi kapas chofana esap tongeni nonom fän mesei.

⁸ Iteiten lesosor üpwe niela ekewe aramasangau lon ewe fanü, üpwe ärala meinisin mi föri mine a ngau me lon telinimwen ewe Samol mi Lapalap.