Isikiel 19 - Chuukese Bible

Echö kölün kechü fän iten ekewe samolun Israel 19.1-14

¹ Kot a üreniei, “Kopwe eäni ei kölün kechü fän iten ekewe samolun Israel. Kopwe apasa:

² A ifan me öchün inemi? A usun chök eman liafefinin laion lein ekewe ätemwänin laion. A konola lein ekewe nienifön laion o oupwu nöün kewe.

³ Iwe, a foleni eman lein nöün kewe, tori a wattela o nönnö ngeni eman nienifön laion. A kaiö usun an epwe liapeni liapan o ochei aramas.

⁴ Iwe, lupwen ekewe mwü ünükün ra rongorong usun, ra atupwalong lon tuwer pwang. Ra riri ngeni selimächä o emwenala Isip.

⁵ Nge lupwen ewe liafefinin laion a küna pwe mine a apilüküni esap fis, pwal mine a witiwiti esap tori, a foleni pwal eman lein nöün kewe, tori a wattela o nönnö ngeni eman nienifön laion.

⁶ Iwe, lupwen a watte, a aniffetal lein ekewe laion, a kaiö usun an epwe liapeni liapan o ochei aramas.

⁷ A atai ekewe imwen maun mi pöchökül me ar kewe telinimw. Iwe, chon ewe fanü meinisin ra fokun niuokus ren osomongun an wörüwör.

⁸ Mürin, chon ekewe mwün ünükün ra feito seni ekis meinisin, pwe repwe maun ngeni. Ra aturala ar toloia won o atupwalong lon tuwer pwang.

⁹ Iwe, ra riri ngeni efoch selimächä o isenalong lon eu tittin man. Ra pwal uweela ren ewe kingen Papilon o aturalong lon imwen fötek, pwe esap chüen wor eman epwe rongorong wörüwörün me won ekewe chukun Israel.

¹⁰ Inom a usun chök efoch irän wain lon eu tanipin wain, a fot ünükün eu koluk, a pwal uaöch o palapal pokiten chomongun ewe koluk.

¹¹ Iwe, palan kewe ra fokun pöchökül o fich ngeni wokun king. Ewe irän wain a märitä pwe a langatamatä tori ekewe kuchu. Aramas meinisin ra küna tekian me chomongun palan.

¹² Nge eman a üttätä ewe irän wain fän an song o aturala won pwül. Iwe, asepwälin ötiu a eniti pwe a pwasala, uan ra mworomworotiu, nge palan kewe mi pöchökül ra pwasala o kekila ren ekkei.

¹³ Nge iei ewe irän wain a fotetiu lon fanüapö lon eu pwül mi pwas.

¹⁴ Iwe, ekkei a ngetewu me lon palan o kenala uan, pwe esap chüen wor efoch palan mi pöchökül a fich ngeni wokun king.” Iei echö kölün kechü aramas repwe eäni kölün kechü.