Isikiel 15 - Chuukese Bible

Chon Jerusalem ra wewe ngeni efoch irän wain mi lomotongau 15.1-8

¹ Iwe, ewe Samol mi Lapalap a kapas ngeniei,

² “Nöün aramas, ren met ewe irän wain a aüchea seni ekewe lusun irän lein wöllap?

³ Ifa usun, aramas ra angei popun o falei och pisek seni? Ika ra föri efoch chüföl seni o isetä pisek won?

⁴ A chök öch an epwe koturulong lon ekkei pwe epwe karala. Ifa usun, are lesopun me ruosop ra karala, nge lukalapan a wiliti mooch, a chüen lomot ngeni och mettoch?

⁵ Ika esap lomot ngeni och mettoch, lupwen esamwo kar, ifa usun, esap watte lomotongauan, lupwen ekkei a kenala, pwe a wiliti mooch? Ewer, esap fokun lomot ngeni och mettoch.

⁶ Iei mine ngang Kot ewe Samol mi Lapalap üa apasa: Usun üa angei ewe irän wain seni ekewe irän lein wöllap o atolonga lon ekkei pwe epwe karala, iei usun üpwe föri ngeni ekewe chon Jerusalem meinisin.

⁷ Iwe, üpwe ü ngeniir. Inamwo ika ra sü seni lon ekkei, ekkei epwe chök kenirela. Nge lupwen üpwe ü ngeniir, oupwe silei pwe ngang ewe Samol mi Lapalap.

⁸ Iwe, üpwe awili ei fanü ngeni fanüapö, pun chon resap allükük,” iei alon Kot ewe Samol mi Lapalap.