Hiop 41 - Chuukese Bible

¹ Ifa usun, ka tongeni efi eman alikitor won efoch ö, ika fötätiu chönawan ren efoch säl?

² Ifa usun, ka tongeni atikalong efoch säl lon pwötün ika pwangeni ngächin ren efoch kakia?

³ Ifa usun, epwe tütüngor ngonuk pwe kopwe fäälimöch ngeni? Ifa usun, epwe eäni kapas pwetete ngonuk?

⁴ Ifa usun, epwe föri eu pwonen atipeeu ngonuk pwe epwe angang ngonuk tori feilfeilachök?

⁵ Ifa usun, kopwe tongeni efisira usun om efisira eman machang, ika föti ngeni efoch säl pwe noum kewe nengin repwe nöüni?

⁶ Ifa usun, ekewe chon attau repwe aninifengen won liwinin? Ifa usun, ekewe chon amömö repwe kinietiu fitukan o eäni amömö?

⁷ Ifa usun, ka tongeni posu silin ngeni chomong fisika ika posu möküran ngeni mächän likapich?

⁸ Are ka atapa i fän eu chök, kosap chüen atapasefäli, pun kopwe chechemeni usun an fiu ngonuk.

⁹ Eman aramas mi ekiekin akufu i epwe lichipüng. Lupwen a chök küna, epwe fokun rükö.

¹⁰ Esap wor eman a pwora pwe epwe tongeni apwökü. Nge iö chök a tongeni ü ngeni?

¹¹ Iö a tongeni fiu ngeni, nge esap feiengau? Esap wor eman won unusen fanüfan a tongeni föri ei.

¹² Iei üpwe chök fos usun pechen ewe alikitor, pwal usun an pöchökül me lapalapan.

¹³ Iö a tongeni asera seni silin ika posu pwochan?

¹⁴ Iö a tongeni ammasala awan mi kula ren ngin mi eniweniw?

¹⁵ Pwal won sökürün a wor telin ililin mi fokun kanefengen o pöchökül usun fau.

¹⁶ Ililin kewe ra fokun pachefengen pwe esor asepwäl a tongeni enilong lefiler.

¹⁷ Ra chufengen eu ngeni eu o akükfengen pwe resap tongeni imwüfesen.

¹⁸ Lupwen a mwesi, a fiwu saram, tinen mesan a usun chök tinen akkar lupwen a tötä.

¹⁹ A ngetewu ekkei me lon awan usun ngeten töl, pwal usun märäkükün ekkei.

²⁰ Ötüöt a ötüwu seni lon pwötün usun ötüötün wowo mi kü me fän eu kama.

²¹ Ngasangasan a tongeni akü mwoli, nge ngeten ekkei a ngetewu seni lon awan.

²² Üan a fokun pöchökül, nge meinisin mi küna i ra niueiti.

²³ Säsärin fitukan a fokun ngüt, a fokun pöchökül pwe esap tongeni mwökütüküt.

²⁴ Leupwan a pöchökül usun eföü fau, a pöchökül usun eu nüföfau.

²⁵ Lupwen a anangatä, ekewe chon pöchökül ra fokun niuokus, resap chüen silei mine repwe föri ren ächewechewen ükün.

²⁶ Esap wor efoch ketilas a tongeni akinasa, esap pwal wor efoch fisika ika föün esefich ika siles a tongeni afeiengaua.

²⁷ Mächä a usun chök apwangapwangen fetilipwas me ren, nge piras a usun chök irä mi kirou me ren.

²⁸ Esap tongeni süla ren ekewe föün esefich, nge ekewe föün öülün ra usun chök pipin fetilipwas me ren.

²⁹ Lifötüföt a usun chök fetilipwas me ren, a takiri tärekikin ekewe fisika.

³⁰ Ililin lukan a usun chök tärupurupun mökkün sepi seni pwül, ra arasa ewe pwakak usun chök eu pisekin tuw warawar.

³¹ A kupeti ewe matau pwe a puropur usun koluk mi pwich lon eu kama o apurätä pwe a usun chök puren noppuk lon nape.

³² A wor puropuren mwurifion. Ren ei, eman a tongeni ekieki pwe ewe matau a nopwechepwech.

³³ Esap wor och won fanüfan a wewe ngeni. I eman mönümanau esap wor an niuokus.

³⁴ A otiwei mönümanau meinisin mi lamalamtekia, a king wor meinisin.”