Hiop 40 - Chuukese Bible

¹ Mürin, ewe Samol mi Lapalap a aisini Hiop,

² “Ifa usun, eman mi kütta mwälin Ewe mi Unusen Manaman epwe tongeni apälüa? Ätewe mi anini ngeni Kot epwe pälüeni.”

³ Mürin, Hiop a pälüeni ewe Samol mi Lapalap,

⁴ “Nengeni, ngang eman aramas mi aücheangau. Met üpwe tongeni pälüeni ngonuk? Üa pineela awei ren pei.

⁵ Üa kapas fän eu, nge üsap tongeni pälüeni. Üa kapas fän aruuan, nge üsap chüen kapassefäl.”

Kot a pwärala an manaman 40.6–41.34

⁶ Mürin, ewe Samol mi Lapalap a pälüeni Hiop seni lon ewe mölümöl o apasa,

⁷ “Kopwe ütä o tipeni tipen mwän. Ngang üpwe aisinuk, nge en kopwe pälüeniei.

⁸ Ifa usun, kopwe amwäliei? Ifa usun, kopwe atipisiei pwe en kopwe pwüng?

⁹ Ifa usun, ka pöchökül usun Ngang? Ifa usun, a osomong osom usun osei?

¹⁰ Mürin kopwe foute ngonuk itetekia me iteföüla o aüföüfa ngonuk ling mi amwarar.

¹¹ Kopwe nenengeni chokewe meinisin mi lamalamtekia, kopwe ninätiu säsen om song wor o atekisoneretiu.

¹² Ewer, kopwe nenengeni chokewe meinisin mi lamalamtekia o atekisoneretiu. Kopwe purätiu ekewe aramasangau me ewe ia ra ütä ie.

¹³ Kopwe irerela meinisin lon ewe pwül o fötekiniir lon ewe lenien sotup.

¹⁴ Mürin, ngang won inisi üpwe pwärätä pwe püsin poum a tongeni amanauok.

¹⁵ Kopwe nenengeni ewe man mi fokun watte itan hipopotamus. Üa föri i usun üa föruk. I a mongö fetil usun eman ätemwänin kow.

¹⁶ Kopwe nenengeni pöchökülen wänükün me pöchökülen fituken lukan.

¹⁷ A tongeni apöchöküla mechan pwe a pöchökül usun efoch irä setar, nge selin afön ra pachefengen.

¹⁸ Chün ra pöchökül usun piras, nge pechen kana ra usun chök fochun mächä.

¹⁹ I akaemanün me lein förien Kot kana mi pöchökül. Ewe Chon Föri chök a tongeni eniwa.

²⁰ A mär anan won ekewe chuk ewe ia ekewe manmwacho meinisin ra kukulou ie.

²¹ A kon lein ekewe irä pwokus iter lotus o opola lein ekewe wowo lon ewe pwakak.

²² Nürün ekewe irä lotus ra pwölüela, nge ekewe silifö mi mär aropen ewe öüwö ra nom pwelin ünükün.

²³ Are ewe chanpupu a öütöüt, esap niuokus. A wor an apilüköch, inamwo ika ewe chanpupu Jortan a pu ngeni mesen awan.

²⁴ Ifa usun, eman epwe tongeni tikilong lon mesan, ika pwangeni pwötün o särei?