Hiop 12 - Chuukese Bible

Hiop a allükülükü än Kot manaman me tipachem 12.1-25

¹ Mürin, Hiop a pälüeni,

² “Ewer, ämi oua aramas tipachem, nge lupwen oupwe mäla, tipachem epwe pwal mäla.

³ Nge a pwal wor ai mirit usun chök ämi, ngang üsap kis fami. Iö esap silei ekei mettoch oua kapas usun?

⁴ Ngang üa uretakir me ren chiechiei. Üa uretakir me rer, ngang eman mi wenechar o pwüng. Me lom üa kökköri Kot, nge i a pälüeniei.

⁵ Esap wor ämi weires, nge oua aitengauaei ai nom lon riaföü, oua wichi ätewe mi arap ngeni an epwe tur.

⁶ Lon imwen ekewe chon solä a wor kinamwe, nge chokewe mi asonga Kot ra nonomöch, ir chokewe mi eäni kot püsin ar pöchökül.

⁷ Iwe, kopwe aisini ekewe manfetal, ir repwe aiti ngonuk ekei mettoch, kopwe aisini ekewe mansüsü, ir repwe ürenuk usun.

⁸ Ika kopwe aisini fanüfan, epwe aiti ngonuk, nge ekewe ikenen leset repwe apworausa ngonuk ei pworaus mi let.

⁹ Iö me lein ekewe mönümanau meinisin esap silei pwe pöün ewe Samol mi Lapalap a föriir?

¹⁰ Manauen ekewe mönümanau meinisin a nom lepöün Kot, pwal ngasangasen aramas meinisin.

¹¹ Ifa usun, sap än ewe seling angang pwe epwe alefila lefilen kapas mürina me kapas ingau, usun chök ewe chönaw a alefila lefilen nennen mongö mi anö me mongö mi ngau?

¹² Tipachem a nom ren ekewe chinlap, nge mirit a nom ren eman mi manauatam.

¹³ Nge tipachem me manaman ra nom ren Kot, a wor an öüröür me mirit.

¹⁴ Are Kot a ataela och, iö epwe tongeni aüsefälietä? Are i a kalapusei eman, iö a tongeni amusa?

¹⁵ Are Kot a amwöchü ekewe koluk, ra pwasatä, nge are a apuela ekewe koluk, a fis noter.

¹⁶ Pöchökül me tipachem ra nom ren Kot. Ewe chon tup me ewe chon atuputup ra nom fän nemenian.

¹⁷ A angei seni ekewe chon öüröür ar tipachem o föri pwe ekewe soukapwüng ra föri föförün chon umwes.

¹⁸ A angei seni ekewe king ar nemenem o fötekiniir.

¹⁹ A atekisona ekewe souasor o asapwilätiu ekewe mi wor ar manaman.

²⁰ A afanafanalai chokewe aramas ra lüküür o angei seni ekewe souakom ar mirit.

²¹ A aworato itengau won ekewe aramas tekia o awesi än ekewe chon pwora pöchökül.

²² A pwärawu mettoch mi alolol seni lon rochopwak o atolonga saram lon lenien rochopwaken mäla.

²³ A atekiatä ekewe mwü, nge mürin a ataarela. A awattela ekewe mwü, nge mürin a föri pwe chor repwe oola.

²⁴ A angei seni ekewe samol won fanüfan ar mirit o afetaleer won fanüapö ia esap wor efoch al ie.

²⁵ Ra atapfeil lon rochopwak, pun esap wor ar saram, a ataroporopafetaleer pwe ra usun chök aramas mi pulas.”