Hiop 1 - Chuukese Bible

Satan a sotuni Hiop 1.1–2.13

¹ Mi wor eman mwän lon ewe fanü Us itan Hiop. Ätei a pwüng o wenechar, a niuokusiti Kot o kul seni föför mi ngau.

² Iwe, a wor füman nöün ät me ülüman nöün nengin.

³ A pwal wor füngeröü nöün sip, ülüngeröü kamel, engeröü ätemwänin kow, limepükü liafefinin aas me chomong, chomong chon angang. Iei mine ei mwän a iteföüla seni ekewe aramas meinisin mi nom lon ewe fanü ötiu.

⁴ Iwe, nöün kewe alüal ra soun föri eu kametip lon en me imwan, lupwen a tori en me an fansoun. Ra pwal titi fefiner kewe ülüman pwe repwe etiir le mongö me ün.

⁵ Nge lupwen ekewe ränin kametip ra wesila, Hiop a tiitiir pwe epwe apiniir. A pwätä lesosorusich o eäni eu asoren kek fän iten nöün kewe meinisin, pun a üra, “Eli a fis pwe nei kewe alüal ra tipis o amamäsini Kot lon leluker.” Iei usun Hiop a föri fansoun meinisin.

⁶ Iwe, a tori eu rän, lupwen ekewe chon läng ra feito o ütä fän mesen ewe Samol mi Lapalap, Satan a pwal nonom lefiler.

⁷ Iwe, ewe Samol mi Lapalap a aisini Satan, “Ia ka feito me ie?” Satan a pälüeni, “Üa feito seni fanüfan, ia üa saifeil ie seni epek tori epek.”

⁸ Iwe, ewe Samol mi Lapalap a üreni Satan, “Ifa usun, ka küna nei chon angang Hiop? Esap wor eman aramas won fanüfan mi wewe ngeni, a pwüng o wenechar, a niuokusitiei o kul seni föför mi ngau.”

⁹ Mürin, Satan a pälüeni ewe Samol mi Lapalap, “Ifa usun, Hiop epwe niuokusituk ika esap wor an feiöch?

¹⁰ Ifa usun, kosap tiela inisin me chon leimwan, pwal meinisin mine a eäni seni feiengau? Ka afeiöchü angangen pöün pwe nöün pwiin sip me kow ra chomongola won ewe fanü.

¹¹ Nge kopwe aitiela poum o atapa meinisin mine a eäni, mürin epwe fokun amamäsinuk.”

¹² Iwe, ewe Samol mi Lapalap a üreni Satan, “Ina, meinisin mine Hiop a eäni epwe nom fän nemenemom, chilon chök kosap atapa inisin.” Mürin Satan a feila seni fän mesen ewe Samol mi Lapalap.

¹³ Iwe, a tori eu rän, lupwen nöün Hiop kewe alüal me föpwül ra eäni eu kametip lon imwen ewe mwänichi,

¹⁴ eman chon angang a feito ren Hiop o üreni, “Lupwen ekewe ätemwänin kow ra tuw ewe pwül, nge ekewe aas ra mongöfetal ünükür,

¹⁵ ekewe chon Sapa ra mwu ngeniir o turufiir meinisin. Iwe, ra niela noum kewe chon angang ren ketilas, nge ngang echök üa süla pwe üpwe ürenuk.”

¹⁶ Lupwen ätei a chüen kapas, pwal eman chon angang a feito o üra, “Eu ekkei seni Kot a turutiu me läng o kenala ekewe sip me ekewe chon angang, nge ngang echök üa süla pwe üpwe ürenuk.”

¹⁷ Nge lupwen ätei a chüen kapas, pwal eman chon angang a feito o üra, “Ekewe chon Kaltea ra war lon ülüngat mwich, ra turufi ekewe kamel o angeerela. Ra niela noum kewe chon angang ren ketilas, nge ngang echök üa süla pwe üpwe ürenuk.”

¹⁸ Iwe, lupwen ätei a chüen kapas, pwal eman chon angang a feito o üra, “Noum kewe alüal me föpwül ra eäni eu kametip lon imwen ewe mwänichi.

¹⁹ Iwe, och asepwäl mi pöchökül a enito seni ewe fanüapö o eniti lepwokukun ewe imw me rüanü pwe a mök. Ewe imw a turutiu won noum kewe alüal me föpwül, iwe ra mäla, nge ngang echök üa süla pwe üpwe ürenuk.”

²⁰ Mürin, Hiop a ütä, a kamwei üfan fän an letipeta o räisöü möküran, a chapala won pwül o fel ngeni Kot.

²¹ Iwe, a apasa, “Üa selela lupwen üa towu seni letipen inei, üpwe pwal selelasefäl lupwen ai üpwe towu seni fanüfan. Ewe Samol mi Lapalap a fangoto, ewe Samol mi Lapalap a angeesefäli, üpwe mwareiti ewe Samol mi Lapalap.”

²² Lon ekei feiengau meinisin mi tori Hiop, i esap tipis, esap pwal etipisi Kot ren an amwäli mine a föri.